Բարձր տեխնոլոգիական արդյունաբերության նախարար Մխիթար Հայրապետյանը հրաժարվել է Ազգային ժողովի պատգամավորական մանդատից, գրել է «Ժողովուրդ» օրաթերթը։
Թերթի տեղեկություններով՝ Հայրապետյանը, որը «Քաղաքացիական պայմանագիր» կուսակցության ընտրացուցակի 36-րդ համարն էր, ինքնաբացարկի դիմում է ներկայացրել։
Հուլիսի 9-ին կառավարության կազմում նրա աշխատանքը չշարունակելու փաստը հաստատել էր վարչապետ Նիկոլ Փաշինյանը։
Ըստ թերթի աղբյուրի՝ Բարձր տեխնոլոգիական արդյունաբերության նախարարությունում նախարարի թիմի ներկայացուցիչները, այդ թվում՝ փոխնախարարները, ազատման դիմումներ են ներկայացնում:
Միևնույն ժամանակ, Հայաստանի ֆուտբոլի ֆեդերացիայի (ՀՖՖ) նախագահի պաշտոնն զբաղեցնելու Հայրապետյանի ծրագրերը, ըստ թերթի, դեռ անորոշ են, քանի որ ընտրությունները նախատեսված են հաջորդ տարվա գարնանը։
ԶԼՄ-ները հուլիսի սկզբին գրել էին, որ Հայրապետյանը հնարավոր է առաջադրվի Հայաստանի ֆուտբոլի ֆեդերացիայի (ՀՖՖ) նախագահի պաշտոնում, քանի որ գործող նախագահ Արմեն Մելիքբեկյանը հայտարարել է, որ չի առաջադրվելու։
