Եվրոպական հանձնաժողովի նախագահ Ուրսուլա ֆոն դեր Լայենն աշխատանքային այցով ժամանել է Երևան, հայտնել են կառավարության մամուլի ծառայությունից:
«Զվարթնոց» օդանավակայանում նրան դիմավորել է ՀՀ փոխվարչապետ Մհեր Գրիգորյանը:
Այցի շրջանակում ֆոն դեր Լայենն առանձնազրույց է ունեցել ՀՀ վարչապետ Նիկոլ Փաշինյանի հետ, որից հետո հանդիպել է կառավարության ներկայացուցիչների հետ: Հանդիպումից հետո նախատեսված է Փաշինյան-ֆոն դեր Լայեն ասուլիս, որտեղ նրանք հանդես կգան հայտարարություններով։
Մինչ Հայաստան ժամանելը ֆոն դեր Լայենն այցելել էր Թուրքիա և Ադրբեջան։ Ադրբեջանի նախագահ Իլհամ Ալիևի հետ բանակցությունների արդյունքներով ֆոն դեր Լայենը հայտարարել էր, որ ԵՄ-ն Հարավային Կովկասում տրանսպորտի, էներգետիկայի և թվային կապի զարգացման համար 200 միլիոն եվրոյի նոր ծրագիր կիրականացնի։
Եվրահանձնաժողովի նախագահի այցը Հայաստան կլինի երկրորդը վերջին երկու ամսվա մեջ։ Հանձնաժողովի նախագահը Երևանում էր մայիսին՝ եվրոպական քաղաքական համայնքի գագաթնաժողովին, որից հետո մասնակցել էր ԵՄ-Հայաստան անդրանիկ գագաթնաժողովին։
ԵՄ-ն Հայաստանին 34 միլիոն եվրոյի անհետաձգելի աջակցություն էր հատկացրել ՝ Ռուսաստանի կողմից սահմանված առևտրային սահմանափակումների հետևանքները մեղմելու նպատակով՝ որպես նախկինում հայտարարված 50 միլիոն եվրոյի աջակցության փաթեթի առաջին տրանշ։
