«Քաղաքացիական պայմանագիր» (ՔՊ) կուսակցությունը հունիսի 7-ի Ազգային ժողովի ընտրություններից հետո քննարկում են խորհրդարանում 3/5 մեծամասնություն ապահովելու տարբերակներ, գրում է «Հրապարակ» օրաթերթը՝ հղում անելով իր աղբյուրներին։
Ըստ պարբերականի տվյալների՝ իշխող ՔՊ-ն մտահոգված է սահմանադրական մեծամասնության բացակայությամբ և առաջիկա հինգ տարիներին քաղաքական օրակարգի իրականացման հնարավոր դժվարություններով։
Թերթը պնդում է, որ իշխանությունները դիտարկում են մի քանի սցենար․ առաջինը ենթադրում է մեծամասնության ապահովում «Բարգավաճ Հայաստան» կուսակցության ձայների հաշվին, իսկ երկրորդ տարբերակով նախատեսվում է ընդդիմադիր խմբակցությունների առանձին պատգամավորների անցումը իշխանական ճամբար։
Լրատվամիջոցի աղբյուրները հայտնում են, որ իշխող թիմում անհանգստացած են նաև ընդդիմության հայտարարություններով՝ հնարավոր բողոքի ակցիաների վերաբերյալ, եթե ԿԸՀ-ն հրաժարվի վերաքվեարկություն նշանակել։
Թերթի զրուցակիցները չեն բացառել նաև ավելի կոշտ սցենար, համաձայն որի՝ իշխանությունները կարող են փորձել ճնշումների և քրեական հետապնդումների միջոցով թուլացնել արմատական ընդդիմությանը, որից հետո նախաձեռնել նոր արտահերթ ընտրություններ՝ Սահմանադրության փոփոխության համար անհրաժեշտ մեծամասնություն ստանալու նպատակով։
Հունիսի 7-ին Հայաստանում անցկացվել են Ազգային ժողովի ընտրություններ, որոնց մասնակցել է 18 քաղաքական ուժ՝ 16 կուսակցություն և 2 դաշինք։ Ընտրությանը, ԿԸՀ նախնական տվյալներով, մասնակցել է 1 477 736 (58,94%) մարդ՝ 2 503 976 ընտրողից: ԿԸՀ-ի նախնական տվյալներով՝ անցողիկ շեմը հաղթահարել է քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
«Բարգավաճ Հայաստան» կուսակցությունը, որը նախնական արդյունքով չի հաղթահարել անցողիկ 4%-ի շեմը, վերահաշվարկ է պահանջել։ Հունիսի 9-ին մոտ 50 ընտրատեղամասում վերահաշվարկի դիմում է ներկայացրել նաև «Ուժեղ Հայաստանը»։
Ընտրությունների վերջնական արդյունքը կհրապարակվի հունիսի 14-ին՝ ինքնաշխատ եղանակով վերահաշվարկներից հետո։
«Ուժեղ Հայաստանը» հայտարարել է, որ ԿԸՀ տվյալները չեն արտացոլում ընտրությունների իրական արդյունքները։ Ընդդիմությունը վարչապետ Նիկոլ Փաշինյանին մեղադրել է իշխանության յուրացման փորձի և ԿԸՀ-ին ճնշելու մեջ։
Կարդացեք նաև՝
Ի՞նչ խախտումներ են արձանագրվել ընտրատեղամասերում
