«Ուժեղ Հայաստան» դաշինքի վարչապետի թեկնածու Սամվել Կարապետյանը հայտնել է, որ երեկ դաշինքի ավելի քան 100 ներկայացուցիչ է ձերբակալվել՝ հայտարարելով, որ այսօր նույնպես ձերբակալությունները շարունակվում են։
«Այս պահին նույնպես կան ձերբակալություններ»,- քվեարկութունից առաջ լրագրողներին հայտարարել է Կարապետյանը։
Կարապետյանն, ի պատասխան Armenia Today-ի հարցին, անդրադարձել է նաև «Ուժեղ Հայաստան» դաշինքի պատգամավորի թեկնածու Դավիթ Ղազինյանի նկատմամբ քրեական հետապնդում հարուցելուն։
«Ինչ-որ բանի են նորից պատրաստվում»,- ասել է Կարապետյանը։
Կարապետյանը կտրականապես հերքել է ընտրակաշառք բաժանելու մասին լուրերը՝ հավելելով, որ եթե նման բան լիներ, իրեն այժմ նորից կալանավորած կլինեին։
Անդրադառնալով այն պնդումներին, թե Ռուսաստանից հատուկ մարդիկ են բերվել ընտրություններին մասնակցելու համար, դաշինքի առաջնորդը նշել է․ «Դա ինչպե՞ս է հնարավոր։ Ռուսաստանից ինչքա՞ն հայ պետք է գա, որպեսզի կարողանա որոշել ընտրությունների ելքը»։
Կարապետյանը հայտնել է, որ ընտրություններին գնում է բարձր և մարտական տրամադրությամբ, ինչպես ողջ հայ ժողովուրդը։
Ըստ նրա՝ այսօր չափազանց կարևոր է երկրում ապահովել իսկական, լեգիտիմ իշխանության ձևավորումը, որպեսզի Հայաստանի ապագան որոշվի երկրի ներսում, այլ ոչ թե դրսից։ Վարչապետի թեկնածուն հույս է հայտնել, որ ընտրություններից հետո երկիրը չի գնա նոր ցնցումների ճանապարհով, քանի որ ցանկացած ներքաղաքական ցնցում հետ է գցում պետության զարգացումը։
Քվեարկությունից հետո լրագրողների հետ զրույցում «Ուժեղ Հայաստան» դաշինքի առաջնորդը հայտարարել է, որ իշխանությունների կողմից ճնշումներն ու ձերբակալությունները շարունակվում են առաջին օրվանից մինչև այսօր, սակայն դրանք չեն կարող ազդել ժողովրդի կամքի վրա, և հայ ժողովուրդը կկատարի ճիշտ ընտրություն՝ հանուն լեգիտիմ իշխանության։
Պատասխանելով այն հարցին, թե ինչ կանի պարտության դեպքում և արդյոք կվերադառնա՞ Ռուսաստան, Կարապետյանը հստակեցրել է, որ նման մտադրություն չունի։
«Մնալու և աշխատելու եմ Հայաստանում։ Մտահոգվելու կարիք չկա, ես այստեղ շատ անելիքներ ունեմ»,- հավելել է նա։
Արտաքին քաղաքականության և Ռուսաստանի հետ հարաբերությունների վերաբերյալ Կարապետյանն ընդգծել է հավասարակշռված մոտեցման կարևորությունը։
«Մենք պետք է լավ հարաբերություններ ունենանք բոլորի՝ և՛ Ամերիկայի, և՛ Եվրոմիության, և՛ Ռուսաստանի հետ։ Սրանք այն երկրներն են, որոնք պետք է օգնեն զարգացնել Հայաստանը։ Մենք չենք կարող ասել, որ լավ հարաբերություններ ենք ունենալու միայն Ռուսաստանի կամ միայն Ամերիկայի հետ։ Մեր դեպքում հավասարակշռությունը միանշանակ է»,- ասել է նա։
Անդրադառնալով Ռուսաստանի կողմից հայկական ապրանքների համար շուկաների հնարավոր փակմանը՝ Կարապետյանը նշել է, որ բացասական է գնահատում նման քայլերը, քանի որ դրանից տուժում են հայ գործարարներն ու հայ ժողովուրդը։ Նա շեշտել է, որ չի կարող ընդունել որևէ երկրի այնպիսի գործողություն, որը վնասում է Հայաստանի քաղաքացուն։
Հունիսի 7-ին Հայաստանում անցկացվում են Ազգային ժողովի ընտրությունները, որոնց մասնակցում է 18 քաղաքական ուժ՝ 16 կուսակցություն և 2 դաշինք։ Կարապետյանը միակ թեկնածուն է, որը քվեարկությանը մասնակցել է տնային կալանքի պայմաններում՝ նրան ընտրատեղամաս է ուղեկցել ոստիկանը։
Կարապետյանին կալանավորել էին 2025-ի հունիսին՝ եկեղեցու դեմ արշավը քննադատելուց հետո։ Ավելի քան վեց ամիս անազատության մեջ անցկացնելուց հետո՝ 2025-ի դեկտեմբերին նրա նկատմամբ խափանման միջոց էր կիրառվել տնային կալանքը և գրավը։
Կարապետյանի գործով դատավարությունը մեկնարկել էր ապրիլի 15-ին, ապրիլի 17-ին դատարանը 3 ամսով երկարաձգել էր նրա տնային կալանքը, ապրիլի 30-ին մերժել այն վերացնելու և վարչական հսկողություն կիրառելու միջնորդությունը։
