Հետխորհրդային տարածքի փորձագետ Արկադի Դուբնովը Armenia Today-ին տված հարցազրույցում մեկնաբանել է ԱՄՆ նախագահ Դոնալդ Թրամփի միջնորդությամբ Վաշինգտոնում Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի բանակցությունների հնարավոր հեռանկարները։
Օգոստոսի 6-ին Հայաստանի կառավարությունը հաստատել էր Վաշինգտոնում Փաշինյանի, Թրամփի և Ալիևի առաջիկա հանդիպման մասին տեղեկությունը: Վարչապետի այցն ԱՄՆ տեղի կունենա օգոստոսի 7-8-ը։ Ըստ ԶԼՄ-ների՝ Հայաստանն ու Ադրբեջանը հանդիպման արդյունքում կարող են փոխըմբռնման հուշագիր ստորագրել:
Դուբնովը կարծում է, որ Վաշինգտոնում վաղը կարող է ստորագրվել ինչ-որ փաստաթուղթ՝ ի դեմս հուշագրի, որը պարտավորեցնող բնույթ կկրի և կհաստատի խաղաղության պայմանագիր ստորագրելու Երևանի և Բաքվի պատրաստակամությունը:
«Սա ենթադրում է Թրամփի հովանու ներքո փաստաթուղթ, և ըստ երևույթին, այն իսկապես պարտադիր բնույթ է կրելու։ Հակառակ դեպքում, Թրամփը նրանց չէր ընդունի Սպիտակ տանը»,- նշել է Դուբնովը։
Փորձագետը գտնում է, որ փաստաթղթում կարող է լինել դրույթ՝ ՀՀ Սահմանադրության մեջ փոփոխություններ կատարելու Երևանի պարտավորության՝ մասնավորապես Ադրբեջանի, հնարավոր է նաև Թուրքիայի նկատմամբ բոլոր տարածքային պահանջները հեռացնելու մասին։
«Պետք չէ ենթադրել, որ Ալիևը տեղի կտա Թրամփի ճնշմանը, որը չի համբերում ևս մեկ աղյուս դնել իր՝ «Նոբելյան դափնեկրի» կոչում ստանալու հիմքում, և հապճեպ կստորագրի խաղաղության պայմանագիրը։ Մյուս կողմից, Վաշինգտոնն այնպիսի առաջարկ է արել, որից և՛ Երևանը, և՛ Բաքուն չէին հրաժարվի․ այն չափազանց ծանրակշիռ է։ Մենք տեսնում ենք, թե ինչպես է Վաշինգտոնը ձգում խաղաղապահի դերին, որը նախկինում Մոսկվայինն էր։ Սա արդեն կայացած փաստ է»,- հավելել է փորձագետը։
