Կոտայքում 4 անձի սպանության մեջ մեղադրվող Թ.Հ.-ի նկատմամբ հանրային քրեական հետապնդում է հարուցվել, հայտնել են Քննչական կոմիտեից։
Թ.Հ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 155-րդ հոդվածի 1-ին մասով (սպանություն, առավելագույն պատիժն ազատազրկում՝ 15 տարի ժամկետով-խմբ․) (2 դրվագ), 155-րդ հոդվածի 2-րդ մասի 10-րդ, 13-րդ (շահադիտական դրդումներով այլ հանցանքը թաքցնելու կամ դրա կատարումը հեշտացնելու նպատակով կատարված սպանություն, առավելագույն պատիժն ազատազրկում՝ 14 տարի ժամկետով -խմբ․) (2 դրվագ), 252-րդ 2-րդ մասի 7-րդ կետով (խոշոր չափերով ավազակություն, ավելագույն պատիժն ազատազրկում՝ 10 տարի ժամկետով-խմբ․):
ՔԿ տվյալներով՝ հոկտեմբերի 12-ին Արամուս գյուղից դեպի Նոր Գյուղ տանող դաշտամիջյան ճանապարհի հարևանությամբ գտնվող հողամասում կենցաղային հարցերի շուրջ ծագած վիճաբանության ժամանակ Թ.Հ.-ն իրեն պատկանող ողորկափող հրացանից կրակոցներ է արձակել նույն գյուղի բնակիչներ Մ.Ս.-ի և Գ.Ղ.-ի ուղղությամբ, ինչի հետևանքով վերջիններս մահացել են:
Կոմիտեից հավելել են, որ Թ.Հ.-ն, առերևույթ հանցանք կատարելուց անմիջապես հետո Կոտայքի մարզի Զովաշեն գյուղի դաշտամիջյան ճանապարհին իրեն պատկանող հրացանով կրակոցներ է արձակել Վ.Մ.-ի և Մ.Հ.-ի ուղղությամբ՝ սպանելով նրանց:
«Կատարվածից անմիջապես հետո Թ.Հ.-ն հափշտակել է Վ.Մ.-ին պատկանող ավտոմեքենան: Նույն օրը Թ.Հ.-ն ձերբակալվել ու տվել է խոստովանական ցուցմունք»,- ասված է ՔԿ հայտարարության մեջ։
ՆԳՆ-ն Արամուսում 64-ամյա տղամարդու և 59-ամյա կնոջ սպանության մասին հայտնել էր հոկտեմբերի 12-ին։ Shamshyan.com-ը հոկտեմբերի 14-ին գրել էր, որ սպանություն կատարած 61-ամյա տղամարդը նրանց սպանելուց հետո սպանել է նաև Զովունիում հաշվառված 46-ամյա Վահե Մարտիրոսյանին և Երևանում հաշվառված 44-ամյա Մարինե Հայրապետյանին։
