Դիմելու ենք ԵՄ-ին՝ քաղբանտարկյալներ պահելու համար Հայաստանին դատապարտելու պահանջով․ Ամստերդամ

«Տաշիր» ընկերությունների խմբի նախագահ Սամվել Կարապետյանի փաստաբանական խումբը դիմելու է Եվրամիությանը և միջազգային դատական կառույցներին՝ պահանջելով դատապարտել Հայաստանին երկրում քաղբանտարկյալների առկայության համար, հայտարարել է ամերիկացի փաստաբան Ռոբերտ Ամստերդամը, որը ժամանել է ՀՀ՝ պաշտպանելու Կարապետյանին։

Ամստերդամը նաև տեղեկացրել է, որ ՀՀ վարչապետ Նիկոլ Փաշինյանի՝ եկեղեցու և ընդդիմախոսների նկատմամբ վարքագծի մասին ամենօրյա ռեժիմով ահազանգելու են միջազգային կառույցներին, այդ թվում՝ Եվրոպայի խորհրդի խորհրդարանական վեհաժողովին։

«Մենք կձգտենք Հայաստանի միջազգային դատապարտմանը՝ քաղբանտարկյալներ պահելու և մարդու հիմնարար իրավունքները խախտելու համար»,- հայտարարել է նա՝ հավելելով, որ Կարապետյանի դեպքը «պայմանագրային հետապնդման» օրինակ է, որի համար Հայաստանի իշխանությունները պետք է պատասխանատվության ենթարկվեն։

Նա շեշտել է իրավական մեխանիզմներով քաղբանտարկյալների հարցը միջազգային կառույցներում բարձրաձայնելու մասին։

«Մենք ամենօրյա ռեժիմով գրոհելու ենք Հայաստանը, մինչև այդ մարդուն չազատեն (Կարապետյան-խմբ)։ Փաշինյանին ամենօրյա ռեժիմով գրոհելու ենք, չենք դադարելու։ Քանի դեռ Փաշինյանը քաղաքական բանտարկյալներ է պահում, մենք ամեն օր բարձրաձայնելու ենք այդ մասին։ Դրանից ավելի հրատապ բան չկա՝ բացառությամբ Ադրբեջանում հայ պատանդների ազատ արձակումը։ Ուզում եմ հստակ հասկանանք նաև, որ մենք առաջնորդվելու ենք բացառապես իրավական միջոցներով, այսինքն՝ կառավարությանը հարցականի տակ չենք դնում, ասում ենք՝ կդիմենք ԵՄ-ին, ԱՄՆ-ին՝ իրազեկելով մարդկանց բռնապետական բնույթի, այն բռնապետի մասին, որը բնակվում է Փաշինյանի և իր տիկնոջ մեջ»,- հավելել է իրավապաշտպանը։

Ամեստրադամը նշել է, որ Կարապետյանը լիովին անմեղ է և երբեք չի մտածել օրենքը խախտելու մասին։ Փաստաբանի խոսքով՝ Կարապետյանի դեմ հարուցված քրեական գործը քաղաքական դրդապատճառներ ունի, իսկ գործարարի դեմ մեղադրանքները «կառուցել են Դիսնեյլենդում»։

Փաստաբանն ընդգծել է, որ Հայ Առաքելական եկեղեցու և «Տաշիր» ընկերությունների խմբի ղեկավարի շուրջ տեղի ունեցող իրադարձությունները խախտում են Մարդու իրավունքների եվրոպական կոնվենցիայի դրույթները։

«Այս մեղադրանքները ներկայացվել են անբարեխղճորեն և խախտում են կրոնի և խոսքի ազատության կոնվենցիայի 9-րդ, 10-րդ և 18-րդ հոդվածները, ինչպես նաև քաղաքական դրդապատճառներով հետապնդման արգելքի վերաբերյալ»,- ասել է Ամստերդամը։

Նա Հայ Առաքելական եկեղեցու վրա ճնշումը և Կարապետյանի դեմ «քաղաքական հաշվեհարդարը» կապել է վարչապետի վախերի հետ։ Իրավապաշտպանը վստահ է, որ իշխանությունները փորձում են փչացնել գործարարի հեղինակությունը՝ վախենալով 2026 թվականին կայանալիք խորհրդարանական ընտրություններից։

«Փայլուն ավտոկրատի դեպքում կարող ես զայրանալ, Փաշինյանին միայն խղճում եմ, ինքը վախին տրված մարդ է»,- հայտարարել է միջազգային իրավապաշտպանը։

Միջազգային իրավապաշտպանը խոստացել է, որ մեկ ամսվա ընթացքում ամբողջ աշխարհը լիովին տեղյակ կլինի Փաշինյանի գործողությունների և նրա քաղաքական ընդդիմախոսների կալանքների մասին: Ամստերդամը նաև նշել է, որ առաջիկայում Կարապետյանի և եկեղեցու դեմ գրոհների մասին հայեցակարգային փաստաթուղթ են հրապարակելու, որը բաղկացած է 60 էջից։

Հունիսին Կարապետյանին կալանավորել էին եկեղեցու դեմ արշավը քննադատելուց հետո, օգոստոսին նա հայտարարել էր «Մեր ձևով» ժողովրդական շարժման ստեղծման մասին, որն սկզբում կլինի ապաքաղաքական, այնուհետ քաղաքական հայտ կներկայացնի։ Կարապետյանն իր մեղադրանքը չի ընդունում՝ այն որակելով քաղաքական:

Կարդացեք նաև՝