Վերջին յոթ տարիների ընթացքում Հայաստանում առանձնապես ծանր հանցագործությունների թիվը տասնապատկվել է, անվտանգության ուժերի ողջ ներուժն ուղղված է ընդդիմության դեմ, հայտարարել է «Մեր ձևով» շարժման համակարգող Նարեկ Կարապետյանը։
Ըստ նրա՝ չնայած Հայաստանը համարվում է աշխարհի ամենաանվտանգ երկրներից մեկը, հանցագործության մակարդակն զգալիորեն աճել է։ 2018 թվականից ի վեր երկրում գրանցվել է 220 000 հանցագործություն՝ նախորդ յոթ տարիների մոտ 100 000-ի համեմատ։ Հարուցված քրեական գործերի միայն 1%-ն է կապված հակակոռուպցիոն պայքարի հետ։
Կարապետյանը շեշտել է, որ քրեական գործերը հիմնականում օգտագործվում են ընդդիմության և անկախ գործարարներին վրա ճնշում գործադրելու նպատակով։
Նա նշել է, որ իրավիճակը հատկապես սուր է մարզերում. ընդդիմադիր հայացքներ ունեցող տեղացի գործարարները քրեական մեղադրանքների են ենթարկվում կեղծ հիմքերով, ինչը խաթարում է տնտեսական գործունեությունը և պետական ինստիտուտների նկատմամբ վստահությունը։
Կարապետյանի խոսքով՝ Հայաստանում վենդետաներն ու սպանությունները հաճախակի են դարձել, բայց իրավապահ մարմինները չեն պայքարում հանցագործության դեմ, այլ միջամտում են ընտրական գործընթացներին։
«Վերջին յոթ տարվա ընթացքում երկրում ձերբակալությունների թիվը յոթ անգամ աճել է՝ 2018 թվականի 900-ից հասնելով տարեկան 7000-ի»,- նշել է նա։
Շարժման համակարգողն ընդգծել է, որ կառավարության կողմից հայտարարված «երկաթե մանդատն» իրականում «ձեռնաշղթաներ է հայ ժողովրդի համար»։ Նա վստահություն է հայտնել, որ հավասարակշռված կառավարման դեպքում իրավապահ մարմինները կկատարեն իրենց հիմնական խնդիրները՝ օրենքի գերակայության ապահովում և քաղաքացիների իրավունքների պաշտպանություն։
Կարապետյանն ավելի վաղ ներկայացրել էր իր թիմի տեսլականը Գեղարքունիքի, ինչպես նաև Ալավերդու զարգացման մասին, հանդես եկել Լոռիում գործարաններ հիմնելու և Մեղրիում բնակարանային ներդրումների առաջարկով։ «Մեր ձևով» շարժումը նաև հայտարարել էր, որ կկազմակերպի Գյումրիի տոնը։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
«Լսել մարդկանց և կիսել գաղափարները»․ կայացավ Սամվել Կարապետյանի «Մեր ձևով» շարժման շնորհանդեսը
