«Մեր ձևով» ժողովրդական շարժման համակարգող Նարեկ Կարապետյանը ներկայացրել է, թե ի՞նչ է առաջարկում շարժումը Հայաստանի ամենահարավային Մեղրիի շրջանում:
Կարապետյանի առաջարկները վերաբերում են քաղաքի համընդհանուր զարգացմանը, ներառյալ՝ էներեգետիկ բարտերի ծրագիր, լոգիստիկ նախագիծ և բնակարանային ներդրումներ:
«Մեղրին չունի այն խնդիրները, ինչ ունեն Հայաստանի մյուս շրջանները՝ ի դեմս գործազրկության և տնտեսական խնդիրների, և ապագա Հայաստանում նա ունենալու է շատ մեծ տնտեսական դեր: Ունենալով այսպիսի սահմանակից երկիր, ինչպիսին է Իրանը, այս տարածաշրջանը լինելու է միշտ հարուստ, զարգացող, և մենք այստեղ ունենք ոչ այնքան գործազրկության, որքան աշխատողների խնդիր»,- ասել է Կարապետյանը:
Բնակարանային ներդրումային նախագծեր
Շարժումն, առաջին հերթին, առաջարկում է Մեղրիում ստեղծել հատուկ բնակարանային ներդրումային նածագծեր, որպեսզի պետությունն աջակցի մարդկանց այն գոտիներից, որտեղ կա մեծ գործազրկություն, տեղափոխվել Մեղրու տարածաշրջան: Դա, Կարապետյանի համոզմամբ, կլուծի երկու հարց՝ անվտանգային և տնտեսական:
Էներգետիկ բարտերի ծրագրեր
Տնտեսությունը զարգացնող առաջարկներից առաջինը Մեղրիում էներգետիկ բարտերի ծրագիրն է, որի արդյունքում Հայաստանը ներմուծում է գազ, ասել է Կարապետյանը:
«Մեղրիում կստեղծվեն ջերմաէլեկտրակայաններ «Ման» ընկերության տեխնոլոգիաներով՝ մինչև 300 միլիոն դոլար ներդրումով, և գազը վերամշակելով՝ կկարողանանք այն վերավաճառել որպես էլեկտրականություն Իրանին: Հայաստանն այսօր դա անում է, բայց քանի որ օդային գծերը, տարողունակությունը քիչ է, առաջարկում ենք դա անել Մեղրիում, որպեսզի ո՛չ գազի, խողովակի, ո՛չ օդային գծերի խնդիր չունենանք»,- նշել է նա:
Երկրորդը կարևոր լոգիստիկ ծրագիրն է՝ հյուսիսը հարավին կապող, Պարսից ծոցը դեպի Սև ծով տանող, որի արդյունքում, ինչպես շեշտել է Կարապետյանը, Հայաստանը կկարողանա շատ արագ բեռներ հասցնել Պարսից ծոցից մինչև Սև ծովի ավազաններ:
Օգնել գյուղացիներին զարգացնել գյուղատնտեսությունը
Ներկայացնելով, որ Հայաստանը տարեկան ներմուծում է մոտավորապես 4-5000 տոննա արևադարձային կիվի տեսակի միրգ և 4-5000 տոննա լիմոն, 4000 տոննա էլ նուռ, նա առաջարկել է պայմաններ ստեղծել գյուղատնտեսության զարգացման համար:
«Մեր առաջարկն է ստեղծել գյուղատնտեսական գենպլան, առաջարկել գյուղացիներին շատ լավ պայմաններով ֆինանսավորում, որպեսզի նրանք կարողանան ավելի շատ այգիներ հիմնել և լուծել Մեղրիի ջրի հարցը՝ սարերից եկող ջրի համար կառուցել ջրամբար, ինչը կլուծի նաև բերքատվության հարցը: Մեղրիի զարգացման այս ծրագիրը դուր կգա մեր հայրենակիցներին և, վերջապես, իմ զոքանչը թույլ կտա ինձ վերադառնալ Երևան»,- եզրափակել է Կարապետյանը:
Կարապետյանը ներկայացրել էր իր թիմի տեսլականը Գեղարքունիքի, ինչպես նաև Ալավերդու զարգացման մասին, հանդես եկել Լոռիում գործարաններ հիմնելու առաջարկով։ «Մեր ձևով» շարժումը նաև հայտարարել էր, որ կկազմակերպի Գյումրիի տոնը։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
«Լսել մարդկանց և կիսել գաղափարները»․ կայացավ Սամվել Կարապետյանի «Մեր ձևով» շարժման շնորհանդեսը
