Հայկական իշխանությունների միջամտությունը եկեղեցու գործերին և վարչապետ Նիկոլ Փաշինյանի «կառավարությունը ես եմ» հայտարարությունը վկայում են Հայաստանում աճող ավտորիտարիզմի մասին, X-ի միկրոբլոգում հայտարարել է ամերիկացի փաստաբան Ռոբերտ Ամստերդամը, որը ժամանել էր երկիր՝ պաշտպանելու «Տաշիր» ընկերությունների խմբի ղեկավար Սամվել Կարապետյանին և ձերբակալված հոգևորականներին։
Ամստերդամը Փաշինյանի այս խոսքերն անվանել է «անորոշ և հիստերիկ բացականչություն», որն ինքնին խոսում է այն «ժողովրդավարության» մասին, որն Արևմտյան երկրները հաճախ գովաբանում են։
Նա հիշեցրել է, որ Փաշինյանը պահանջել է բոլոր այն պաշտոնյաների հրաժարականը, ովքեր համաձայն չեն «Հայաստանի էլեկտրական ցանցերի» գործով միջազգային արբիտրաժում պարտությունը չընդունելու իր դիրքորոշման հետ։
«ՀՀ կառավարության վարքագիծը և օրենքի գերակայության սկզբունքից նրանց հեռու լինելը պետք է լուրջ մտահոգության առիթ դառնան բոլորիս համար, ովքեր հավատարիմ են ժողովրդավարության էությանը և եկեղեցու ու պետության բաժանման սկզբունքին։ Այս ուշագրավ մամուլի ասուլիսում վարչապետը բացարձակապես անընդունելի ձևով սպառնում է գլխավորել կաթողիկոսին փոխարինելու շարժում»,- հավելել է Ամստերդամը։
Փաստաբանը նշել է, որ վարչապետն անձնական պատճառներով մեղադրանքներ է առաջադրում Ամենայն Հայոց կաթողիկոս Գարեգին Բ-ի դեմ, որոնք լիովին դուրս են Հայաստանի սահմանադրության և կառավարության ղեկավարի լիազորությունների շրջանակից։
Ամստերդամը կարծում է, որ վարչապետի վարքագիծը դիտող յուրաքանչյուր ոք պետք է մտահոգված լինի Հայաստանի կառավարման ապագայով։
Փաստաբանը շեշտել է, որ իշխանափոխության կոչ չի անում։ Նա միայն Հայաստանի ժողովրդին կոչ է արել հաջորդ ընտրություններում ուշադիր քննարկել այն անձի մանդատի վերականգնման հարցը, ով, ակնհայտորեն, «մոռացել է իր պարտականությունները թե՛ Սահմանադրության, թե՛ Աստծո առջև»։
Փաշինյանն օգոստոսի 28-ին կայացած ճեպազրույցի ժամանակ ասել էր՝ «կառավարությունը ես եմ»։ Այսպես էր նա մեկնաբանել կառավարության ներկայացուցիչների խոսքերը ՀԷՑ-ի գործով միջազգային արբիտրաժային որոշման պարտադիր լինելու մասին՝ կոչ անելով կառավարության նման ներկայացուցիչներին հրաժարական տալ։ «Տաշիր» ընկերության փոխնախագահ Նարեկ Կարապետյանը շնորհակալություն էր հայտնել վարչապետին և նշել, որ իր խոսքերով՝ նա ամրապնդում է ՀԷՑ-ի դիրքերը Ստոկհոլմի արբիտրաժում։
