Հայաստանի պետական եկամուտների կոմիտեն (ՊԵԿ) բացահայտել է առանց համապատասխան լիցենզիաների առցանց խաղերի կազմակերպման սխեմա, որի հետևանքով պետությանը պատճառված նախնական վնասը գերազանցում է 2,4 միլիարդ դրամը։
Գերատեսչության տվյալներով՝ գործունեության մեջ կարող էին ներգրավված լինել հարյուրավոր անձինք։ Իրավապահ մարմինները Երևանի տարբեր հասցեներում գործող մի շարք գրասենյակներում, որոնք, ըստ քննության, առնչություն ունեն այս սխեմային, հայտնաբերել են հարյուրավոր աշխատակիցների, համակարգիչներ, սերվերային սարքավորումներ, բջջային հեռախոսներ, SIM քարտեր, ձայնա և տեսաձայնագրման սարքեր, ինչպես նաև մեծ քանակությամբ էլեկտրոնային և թղթային փաստաթղթեր։
Նախնական տվյալների համաձայն՝ գործունեությունը կրել է կազմակերպված բնույթ։ Քննությունը ենթադրում է, որ գործել են խմբերի ղեկավարներ և գործակալներ, որոնք զբաղվել են նոր օգտատերերի ներգրավմամբ և խաղային հարթակներում նրանց ակտիվության խթանմամբ։
ՊԵԿ-ի հաղորդմամբ՝ պաշտոնական աշխատավարձերից բացի, աշխատակիցների մի մասը պարբերաբար ստացել է կանխիկ բոնուսներ և հավելավճարներ։ Նման վճարումների ընդհանուր ծավալը, ըստ կոմիտեի, գերազանցել է 950 միլիոն դրամը և չի արտացոլվել հարկային հաշվետվություններում։ Նախնական հաշվարկներով՝ չվճարված եկամտային հարկի ծավալը կարող է գերազանցել 193 միլիոն դրամը։
Գերատեսչությունում չեն բացառում, որ գործունեության իրական ծավալները կարող էին զգալիորեն ավելի մեծ լինել։
Ստուգումների ընթացքում նաև տվյալներ են ձեռք բերվել ֆինանսական գործարքների տարբեր մեխանիզմների վերաբերյալ։ Ըստ ՊԵԿ-ի՝ հաճախորդների միջոցներն օգտագործվել են խաղային հաշիվների համալրման և միջնորդավորված մեխանիզմների միջոցով խաղադրույքներ կատարելու համար։ Որոշ դեպքերում արձանագրվել են նաև կրիպտոարժույթների կիրառմամբ գործարքներ, այդ թվում՝ փոխանցումներ, ավանդներ և շահումների վճարումներ։
ՊԵԿ-ում հայտարարել են, որ գործունեությունն իրականացվել է առանց օրենքով նախատեսված լիցենզիաների։ Գործի նյութերը փոխանցվել են Հայաստանի քննչական կոմիտե, որտեղ հարուցվել է քրեական վարույթ և իրականացվում է նախաքննություն։
