Շտապօգնության ծառայության տնօրենի մեղադրանիքից հետո ՔՊ-ն քննարկել է առողջապահության նախարարի ազատման հարցը․ ԶԼՄ

Հանրապետական շտապօգնության ծառայության տնօրեն Սահակ Հակոբյանին ներկայացված մեղադրանքից հետո երեկ՝ հուլիսի 30-ին, ՔՊ-ն նիստ է գումարել, որի ընթացքում քննարկվել է ՀՀ առողջապահության նախարար Անահիտ Ավանեսյանի հեռացման հարցը, գրել է «Ժողովուրդ»-ը։ Որպես հնարավոր այլընտրանք, նիստի մասնակիցները քննարկել են ներկայիս տեղակալ Լևոն Հակոբյանի թեկնածությունը: Թերթը նշել է, որ «տևական ժամանակ է՝ իշխանությունները դժգոհ են Ավանեսյանի աշխատանքից, փորձում են նրան փոխարինող գտնել»։ Հակոբյանն իր պաշտոնում նշանակվել է 2019 թվականի մարտի 25-ին, սակայն իր գործունեությունը սկսել է Երևանի քաղաքապետարանի աշխատակազմի առողջապահության վարչությունից։ Թիվ 5 պոլիկլինիկայում նա եղել է տնօրենի ժամանակավոր պաշտոնակատար։ Օրաթերթին չի հաջողվել մանրամասները իմանալ  ո՛չ Հակոբյանից, ո՛չ ԱՆ մամուլի խոսնակ Մարիամ Ծատրյանից Առողջապահության նախարարության ղեկավարության հնարավոր փոփոխության մասին։ Հուլիսի 30-ին ԱՆ Հանրապետական շտապօգնության ծառայության տնօրեն Սահակ Հակոբյանին մեղադրանք էր ներկայացվել զորակոչիկին բժշկական կեղծ ախտորոշման հիմքով պարտադիր ժամկետային զինվորական ծառայությունից ազատելու դիմաց առանձնապես խոշոր չափերով կաշառք ստանալու համար։