«Շատ հանգիստ հերթագրվեցի», «ՄՌՏ-ից եմ օգտվել», «Չեմ հավատում». հարցում՝ առողջության ապահովագրության մասին

Հունվարի 1-ից Հայաստանում գործում է առողջության համընդհանուր ապահովագրության համակարգը: Վարչապետ Նիկոլ Փաշինյանի տվյալներով՝ 65+ տարիքի 50 հազար 73 թոշակառու հունվարի 29-ի դրությամբ ստացել է 4,3 միլիարդ դրամի առողջապահական ծառայություն պետական բյուջեի միջոցներով:

Առողջության ապահովագրությունն անհրաժեշտ դեղերի մի մասը տրամադրում է անվճար, մյուս մասը՝ համավճարով։ Այս ցանկը 2027 թվականից հետո գուցե ընդլայնվի: Բացի այդ, համակարգում կան ծառայություններ, որոնք ներառված չեն պետական փաթեթում: Կա նաև խնդիր, եթե ծառայությունները սահմանափակ են, օրինակ՝ Առողջապահության նախարարության ղեկավար Անահիտ Ավանեսյանի խոսքով՝ բժշկական ապահովագրության շրջանակներում ՄՌՏ-ն հնարավոր կլինի տարեկան 2 անգամ անվճար կատարել:

Armenia Today-ը հարցում է իրականացրել մայրաքաղաքում՝ հետաքրքրվելով, թե օգտվե՞լ են արդեն համակարգից, ի՞նչ խնդիրների են բախվել, անվճա՞ր են բուժվել քաղաքացիները, թե՞ ոչ:

Քաղաքացիների մի մասը պատասխանել է, որ գրանցվել են և նաև օգտվել անվճար ծառայություններից:

«ՄՌՏ-ից օգտվել եմ»,- նշել է պոլիկլինիկայի այցելուն։

Մյուսները դեռ չէին հասցրել օգտվել ծառայություններից:

«Դեռ չէ, բայց պատրաստվում եմ։ Տեղեր կան՝ գրանցվելը հեշտ է, տեղեր կան՝ դժվար է։ Հատվածներ կան բժշկության մեջ, որոնք դեռ մուտք չեն արել։ Ամեն դեպքում, հուսով ենք, ի օգուտ քաղաքացու կլինի»,- ասել է հարցման մեկ այլ մասնակից։

Հարցվածներից մի քանիսն էլ նշել են, որ չեն գրանցվել՝ օգտվելու ապահովագրությունից։

Մանրամասները՝ տեսանյութում։