Կառավարությանը ենթակա վեց տեսչական մարմինները միավորելու նախագիծ չի շրջանառվում, Armenia Today-ի հարցմանն ի պատասխան՝ հայտնել են ՀՀ վարչապետի աշխատակազմի տեսչական մարմինների աշխատանքների համակարգման գրասենյակից՝ անդրադառնալով կառույցները միացնելու վերաբերյալ մամուլում տարածված լուրերին։
Գրասենյակից հստակեցրել են, որ նման նախագիծ թե՛ վարչապետի աշխատակազմը, թե՛ որևէ այլ պետական մարմին չի շրջանառում։
Գերատեսչությունից Armenia Today-ին տեղեկացրել են, որ մայիսի 1-ի դրությամբ՝ բոլոր 6 տեսչական մարմիններում աշխատում է 920 աշխատակից, նրանցից 219-ը՝ Առողջապահական տեսչական մարմնում, 173-ը՝ Բնապահպանության և ընդերքի, 41-ը՝ Կրթության, 57-ը՝ Շուկայի վերահսկողության։
Սննդամթերքի անվտանգության տեսչական մարմինն ունի 239, իսկ Քաղաքաշինության, տեխնիկական և հրդեհային անվտանգության տեսչական մարմինը՝ 191 աշխատակից:
Այս տեսչական մարմինները ձևավորվել են 2018 թվականին՝ ոլորտի բարեփոխումների շրջանակում 18 տեսչությունների օպտիմալացման արդյունքում։
Ապրիլի 23-ին «Ժողովուրդ» օրաթերթը, հղում անելով կառավարությանը մոտ կանգնած աղբյուրներին, գրել էր, որ իշխանությունները նպատակ ունեն բոլոր տեսչական մարմինները միավորել։
