Արցախի Հանրապետության նախագահ Սամվել Շահրամանյանը դատական հայց է ներկայացրել ՀՀ ԿԳՄՍ նախարարության և 9-րդ դասարանի Հայաստանի պատմություն դասագրքի հեղինակ Նժդեհ Հովսեփյանի դեմ, հայտնել է փաստաբան Ռոման Երիցյանը։
Արցախի նախագահը դատարանից պահանջել է պատասխանողներին պարտավորեցնել հերքել դասագրքում արտացոլված՝ «ԼՂՀ նախագահը ստորագրեց ԼՂՀ-ն լուծարելու հրամանագիր» տեղեկությունը։ Շահրամանյանը պատասխանողներից պահանջել է հրապարակավ հայտարարել, որ տեղեկությունը կեղծ է և ոչ իրական։
Շահրամանյանը նաև պահանջել է ՀՀ բոլոր դպրոցներում արգելել դասագրքի՝ նշված հատվածի ուսուցանումը՝ մինչև դատական ակտի ուժի մեջ մտնելը։
Երիցյանն օգոստոսին դասագրքում Շահրամանյանին առնչվող տեղեկությունները զրպարտչական էր որակել։
««ԼՂՀ նախագահը ստորագրեց ԼՂՀ-ն լուծարելու հրամանագիր» տեղեկությունը զետեղելով դասագրքում՝ Հայաստանի իշխանությունը փորձում է Արցախի անկումը բացառապես վերագրել Արցախի պաշտոնյաներին, ինչն անընդունելի է։ Թեև հիմա բոլորս, և մանավանդ արցախցիները լավ գիտեն, թե ովքեր են հանձնել Արցախը, բայց ապագա սերնդի համար վերոնշյալ ձևակերպումը կարող է որոշիչ տեղեկություն դառնալ։ Հետագայում պատմության մեջ Շահրամանյանը կարող է ներկայացվել որպես Արցախը հանձնող իշխանություն, մինչդեռ դասագրքի հեղինակները երբևէ չեն տեսել ու չէին կարող Արցախը հանձնելու հրամանագիր տեսնել։ Հարց է նաև, թե ինչո՞ւ չեն խոսում հետագայում այդ հրամանագիրն անվավեր ճանաչելու մասին»,- հայտարարել էր Երիցյանը։
2023-ի սեպտեմբերի 19-20-ն Ադրբեջանի ձեռնարկած ռազմական ագրեսիայից հետո Շահրամանյանը սեպտեմբերի 28-ին հրամանագիր էր ստորագրել Արցախի բոլոր պետական կառույցներն ու կազմակերպությունները մինչև 2024-ի հունվարի 1-ը լուծարելու մասին։ 2023-ի դեկտեմբերին Արցախի նախագահը հայտարարել էր, որ իրավական դաշտում պետական մարմինների լուծարում նախատեսող փաստաթուղթ գոյություն չունի։ Մայիսի 14-ին Երիցյանը հրապարակել էր Շահրամանյանի հրամանագիրը, որով նա անվավեր էր ճանաչել 2023-ի սեպտեմբերի 26-ին Արցախը լուծարելու մասին հրամանագիրը։ Դասագրքի վերաբերյալ իրավական գործընթաց սկսելու մասին փաստաբանը հայտնել էր 2025-ի օգոստոսին։
