Տնտեսվարողները Հանրապետության հրապարակում՝ կառավարության դիմաց, 5-րդ անգամ բողոքի ակցիա են իրականացրել՝ ընդդեմ փոքր և միջին բիզնեսի շրջանառության հարկի 5%-ից 10%-ի բարձրացման։ Տնտեսվարողներից ոմանք բողոքում էին մեկ այլ փոփոխությունից, ըստ որի՝ որպես միկրոբիզնես հունվարի 1-ից զրկվել են շրջանառության հարկ վճարելու հնարավորությունից ու ստիպված են վճարել 20% եկամտային հարկ:
Տնտեսվարողները լրագրողներին հայտնել են, որ փոփոխությունները ՓՄՁ-ների փակմանն են հանգեցնելու։ Նրանք նշել են, որ հանդիպել են տնտեսական բլոկի ներկայացուցիչների, այդ թվում՝ ՊԵԿ նախագահ Էդուարդ Հակոբյանի հետ, բայց իրենց գոհացուցիչ պատասխան չեն տվել։
«Ոչ մի հուսադրող պատասխան չեն տվել, եթե այդ պատասխանները լինեին, այսօր այստեղ չէինք գա։ Սա հարկային տեռոր է։ Հիմա բոլորիս սնանկացնելու են»,- ասել են տնտեսվարողները
«ՓՄՁ համագործակցության ասոցիացիայի» կառավարման խորհրդի նախագահ Հակոբ Ավագյանը լրագրողներին հայտնել է, որ փոքր ու միջին բիզնեսին առնչվող օրենքներն իշխանություններն առանց դրանց ազդեցությունը գնահատելու են ընդունել։
«Չեն գնահատել, օրինակ, հագուստ վաճառողն ի՞նչ խնդիր ունի, սարքավորումներ բերողն ի՞նչ խնդիր ունի։ Կամ, օրինակ, մարզային, սահմանամերձ փոքր խանութը, որը տարեկան 12 մլն դրամ շրջանառություն ունի, հունվարի 1-ից ասում են՝ դու էլ միկրոբիզնես չես։ Ճիշտ չէ Երևանի Ամիրյան փողոցի և մարզային կրպակին հարկել նույն դրույքաչափերով։ Սա լավ մտածված օրենսդրություն չէ»,- ասել է Ավագյանը։
Նա նշել է, որ ՊԵԿ նախագահի հետ հանդիպմանը տնտեսական բլոկի ներկայացուցիչները մասնագիտական դաշտ են մտել, փորձել են բացատրել, թե ինչպես պետք է ապահովել ՊԵԿ-ի պահանջած փաստաթղթաշրջանառությունը։ Ավագյանը, սակայն, նշել է մարդկանց իրազեկվածության ցածր մակարդակի մասին։
«Հանդիպմանն ասացինք, որ ամեն մարդ չէ, որ կարող է օգտվել իրենց մատնանշած տեխնոլոգիաներից կամ ինքնուրույն հաշվապահություն անել։ Իրենց պահանջած փաստաթղթաշրաջանռությունն ապահովելու համար մարդիկ ստիպված են լինելու հաշվապահ պահել, ինչը նաև հավելյալ ծախս է ենթադրում։ Մարդիկ անգամ մեծ ցանկության դեպքում չեն կարող հիմնավորել իրենց ձեռքբերումները։ Բերեմ ոսկու շուկայի օրինակը։ Ասում ենք՝ եթե ֆիզիկական անձից է հումք ձեռք բերում, պետք չէ հարկել, բայց «հումք ձեռք բերել» ասվածը նշանակում է ստորագրված պայմանագիր, ինչը պրակտիկ դաշտում հնարավոր չէ»,- շեշտել է Ավագյանը։
Բողոքի ակցիայի մասնակիցները տեղեկացրել են, որ փետրվարի 7-ին՝ ժամը 11։00-ին, հանդիպելու են ԱԺ «Քաղաքացիական պայմանագիր» խմբակցության պատգամավոր, ԱԺ տնտեսական հարցերի մշտական հանձնաժողովի նախագահ Բաբկեն Թունյանի հետ։
Ֆինանսների փոխնախարար Արման Պողոսյանն ԱԺ-ում լրագրողներին ասել է, որ նոր համակարգը թույլ է տալիս նվազեցնել հարկերը, և նախարարությունը համաձայն չէ պնդման հետ, թե հարկային բեռն ավելացել է։
«Համաձայն չեմ դիտարկումների հետ, որ շրջանառության հարկի գծով հարկային բեռը բարձրացել է։ Դրույքաչափն, այո, բարձրացել է, բայց, զուգահեռաբար, լայն ու ազատական հնարավորություններ են տրվել շրջանառության հարկ վճարողներին։ Մասնավորապես, նրանք կարող են փաստաթղթերով հիմնավորել իրենց ձեռքբերումները և հարկը համապատասխան չափով նվազեցնել։ Այստեղ կարևորն այն է, որ ձեռքբերումները պատշաճ փաստաթղթավորողների համար վերջնարդյունքում ոչ միայն կարող է հարկը չբարձրանալ, այլ նվազել»,- ասել է փոխնախարարը։
Նա նշել է, որ տնտեսվարողների հետ հանդիպումները կառուցողական մթնոլորտում են անցել։ Փոխնախարարը հավելել է, որ Ֆինանսների նախարարությունն օրենսդրական փոփոխությունները վերանայելու որևէ հիմնավոր փաստարկ չի տեսնում։
2024-ի մայիսի 2-ի նիստում կառավարությունը որոշել էր բարձրացնել փոքր և միջին բիզնեսի շրջանառության հարկի դրույքաչափը՝ գործող 5-ի փոխարեն սահմանելով 10%-ի սահմանաչափ։
Փոքր և միջին բիզնեսի շրջանառության հարկի դրույքաչափը չբարձրացնելու պահանջով բողոքի ակցիաներ էին տեղի ունեցել նաև հունվարի 13-ին, 23-ին, 27-ին և հունվարի 30-ին։
ԱԺ «Հայաստան» խմբացության պատգամավոր Թադևոս Ավետիսյանն Armenia Today-ին հայտնել էր, որ մի շարք մասնագիտություններ և ծառայություններ հատուկ հարկման համակարգից դուրս բերելու և հարկման ընդհանուր համակարգ ներառելու դեպքում հազարավոր փոքր բիզնեսներ կանգնելու են փակման ռիսկի առջև։ Նրա խոսքով՝ փոփոխությունը չի նպաստելու հարկային մուտքերի ավելացմանը, քանի որ գործունեությունը դադարեցնելու պատճառով փոքր բիզնեսը հարկ չի վճարելու։
