Երևանի Ոսկու շուկայի մի խումբ աշխատակիցներ այսօր՝ հունվարի 13-ին, բողոքի ակցիա են իրականացրել ՀՀ կառավարության շենքի դիմաց: Նրանք դեմ են հունվարի 1-ից շրջանառության հարկի կրկնակի բարձրացմանը՝ 5-ից 10%-ի։
«Պետք է փաստաթղթավորենք մեր յուրաքանչյուր ապրանքը, որ մեր հարկը նվազի։ Մեզ ասել են նոր ՀՕ-ով մեր շրջանառության հարցը դառնում է 10%։ Բայց այսօրվա դրությամբ՝ դա անիրատեսական պահանջ է»,- ասել է ոսկու վաճառքով զբաղվողներից մեկը։
Մեկ այլ մասնակից նշել է, որ իրենց ոլորտում ապրանքի փաստաթղթավորում անելը անհնար է, և դա ընդամենը 1,5%-ից 1%-ի կհասցնի հարկը։
«Մենք ոսկու շուկայում գործառույթներ ունենք, որ չենք կարող փաստաթղթավորել: Օրինակ, մարդը գալիս է, բերում է 10 գրամանոց շղթա, ուզում է փոխել 15 գրամանոցի: Ես ո՞նց եմ դա փաստաթղթավորելու։ Մի շարք բարդույթներ կան օրենքի հետ կապված, մեզ պետք է բացատրեն»,- պարզաբանել է ցուցարարը։
Ոսկու առևտրով զբաղվողներից մեկը բողոքել է, որ ՀՕ-ում փոփոխությունները կայացվել են առանց ոլորտի առանձնահատկությունները հաշվի առնելու։ Ըստ նրա՝ անհրաժեշտ էր հանձնաժողով գումարել և հարցնել նաև իրենց կարծիքը։
«Օրենք ընդունելուց հաշվի չեք առնո՞ւմ, թե ինչի մասին է խոսքը։ Մենք 20 տարի այդ գործունեության մեջ, նույնիսկ մեզ համար է դժվար այդ գործողություններից (փաստաթղթավորում) դուրս գալ, մտնել ամեն անգամ։ Ենթադրենք ես լոմում եմ ապրանքը, որտեղից ցույց տամ փաստաթուղթ, որ ես լոմել եմ ապրանքը»,- ասել է բողոքի ակցիայի մասնակիցը։
Ակցիայի մասնակիցները վարչապետ Նիկոլ Փաշինյանի անունով նամակ են գրել՝ պահանջելով հանդիպում վարչապետի և իրավասու գերատեսչությունների ղեկավարների հետ: Նրանք դեռևս չգիտեն, թե մինչ դիմումի բավարարումը կաշխատե՞ն, թե գործադուլի կգնան։
2024 թվականի մայիսի 2-ի նիստի ժամանակ կառավարությունը որոշել էր բարձրացնել փոքր և միջին բիզնեսի շրջանառության հարկի դրույքաչափը՝ գործող 5-ի փոխարեն սահմանելով 10%-ի սահմանաչափ։ Հարկային շեմի բարձրացմամբ՝ կառավարությունը նախատեսել էր 17,8 միլիարդ դրամի պետական եկամուտների աճ ունենալ։
