Այսօր Բաքվից հացահատիկով բեռնված վագոններ են մեկնել, դրանք Ռուսաստանից Ադրբեջանի միջոցով տարանցիկ ճանապարհով ուղևորվում են Հայաստան, հայտնել են ադրբեջանական լրատվամիջոոցները։
Ըստ հրապարակումների՝ Հայաստան է ուղարկվել 7 վագոն, որոնք տեղափոխում են 488 տոննա հացահատիկ։
Մինչ օրս Ռուսաստանից Հայաստան Ադրբեջանի միջոցով տարանցիկ ճանապարհով տեղափոխվել է ավելի քան 23 000 տոննա հացահատիկ, ինչպես նաև ավելի քան 700 տոննա պարարտանյութ, նշել են ԶԼՄ-ները։
Մարտի 24-ին ադրբեջանական ԶԼՄ-ները հայտնել են, որ Ադրբեջանի տարածքով Հայաստան է ուղարկվել 4 վագոն պարարտանյութ և 1 վագոն հնդկաձավար։
2025 թվականի նոյեմբերին ռուսական ցորենով բեռնված գնացք էր ժամանել Հայաստան՝ անցնելով Ադրբեջանի և Վրաստանի տարածքով։ Ռուսաստանի տրանսպորտի նախարարությունը տեղեկացրել էր, որ մինչև 2026 թվականի հունվարի վերջ նախատեսում է Ադրբեջանի տարածքով նոր երկաթուղային երթուղով Հայաստան ուղարկել ցորենով բեռնված ևս 132 վագոն:
Վառելանյութի առաջին խմբաքանակն Ադրբեջանից ներկրվել էր 2025 թվականի դեկտեմբերի 19-ին. Հայաստան էր մուտք գործել 1300 տոննա A95 բենզին հայ-վրացական սահմանին գտնվող Այրում կայարանով:
«Քաղաքացիական պայմանագիր» կուսակցության պատգամավոր Բաբկեն Թունյանը փետրվարին հայտարարել էր, որ Հայաստանը 1-2 ամսից կարող է ապրանքներ արտահանել Ադրբեջան։
Թարմացված է՝ 24.03.2026 | 10:30
