Երևանում Armenia Today-ի հարցմանը մասնակցած քաղաքացիների մեծամասնությունը քննադատել է «Տաշիր» ընկերությունների խմբի նախագահ Սամվել Կարապետյանի կալանավորումը՝ անվանելով այն «անմտություն», «անհիմն» և «անխղճություն»։ Հարցմանը մասնակցած 42 քաղաքացիներից միայն երկուսն են դրական կարծիք հայտնել Կարապետյանի կալանավորման վերաբերյալ՝ հայտարարելով, որ նա որոշել է մտնել քաղաքականություն, իսկ իրենք աջակցում են վարչապետ Նիկոլ Փաշինյանին։
Հարցված տղամարդկանցից մեկն ասաց, որ նորմալ չէր Կարապետյանի կալանավորումը, և պատճառ չկար։ Մի կին ընդգծել է, որ շատ վատ կարծիք ունի Կարապետյանի նկատմամբ տեղի ունեցածի մասին։
«Ինչո՞ւ պետք է կալանավորեին Կարապետյանին։ «Քաղաքացիական պայմանագիրը» երկրին 7 տարում ի՞նչ օգուտ է տվել, որևէ դրական քայլ երկրի համար արե՞լ են։ Խայտառակ վիճակ է, իսկ իրենց լեզուները՝ երկար»,- հավելեց կինը։
Քաղաքացիներից մեկն էլ նշեց, որ մեծ հպարտություն է, երբ ազգի մեջ Կարապետյանի նման մարդիկ կան։
«Բարերարի, գործարարի, մեծ ու թասիբով հայի կալանավորմանը բացասաբար եմ վերաբերվում, եթե շուրջը նայենք՝ կտեսնենք, թե ինչքան բան է նա ստեղծել»,- շեշտեց քաղաքացին։
Մի տղամարդ էլ ընդգծեց, որ Կարապետյանը «Հայաստանի համար շատ բան է արել, նրան կալանավորել պետք չէր»։
«Ճիշտ է արել, որ եկեղեցուն պաշտպան է կանգնել։ Չի կարելի եկեղեցուն անպատվել, մենք քրիստոնյա ենք, թող Աստծուց վախենան»,- նշեց հարցվածը։
Հարցման մասնակիցները կարծիք են հայտնել, որ Կարապետյանի կալանավորումը ՀՀ իշխանություններն իրականացրել են Թուրքիայի և Ադրբեջանի հանձնարարությամբ։
Մի կին էլ նշեց, որ հարգում է Կարապետյանին, բայց, իր խոսքով, իմաստ չուներ «մտնել քաղաքականության մեջ»։
«Վարչապետը եկեղեցուն չէր թիրախավորել, այլ սպասավորներին»,- կարծում է նա։
Հարցվածներից մեկն էլ ընդգծեց, որ «ավելի լավ է՝ Կարապետյանը ՌԴ գնա, քանի որ այնտեղի քաղաքացի է»։
«Գալիս է այստեղ և Ռուսաստանի հանձնարարությունն է կատարում, ի՞նչ է արել հայ ազգի համար։ Ճիշտ է կալանավորումը, քանի որ եթե Հայաստանում չի բնակվում, իրավունք չունի խառնվելու Հայաստանի քաղաքական հարցերին»,- ասացին քաղաքացիները:
Մի կին էլ հավելեց, որ նորմալ մարդը չի կարող դրական վերաբերվել Կարապետյանի կալանավորմանը։
«Ծուռ հայելիների աշխարհում ենք ապրում։ Այդ մարդն այքան բան է արել։ Անազնիվ էր նրան կալանավորելը, ճանաչված հարգված մարդու նկատմամբ մի՞թե կարելի էր նման բան անել»,- հավելեցին հարցմանը մասնակցածները:
Կարապետյանին պատկանող «Հայաստանի էլեկտրական ցանցեր» ՓԲԸ-ն ազգայնացնելու մտադրությունը նրանցից շատերը Հայաստանի միջազգային հեղինակության համար վտանգավոր են համարել։ Քաղաքացիների կարծիքով՝ ազգայնացումը կարող է առաջ բերել տարբեր ռիսկեր, որոնք իշխանությունները, մեծ հավանականությամբ, հաշվի չեն առել։
«Ազգայնացումը բացասաբար կանդրադառնա երկրի հեղինակության և ընդհանուր իրավիճակի վրա։ Ազգայնացնելու ցանկությունը քիչ է, չէ՞ որ միջազգային ատյաններ կան, իր հոր դուքյանը չէ, որ բռնի ու միանգամից սեփականացնի»,- շեշտեցին քաղաքացիները։
Հարցվածներից մեկի կարծիքով էլ՝ «եթե Փաշինյանը մի բան ցանկանում է, իրագործում է, քանի որ բռնապետ է»։
«Եթե պիտի ՀԷՑ-ը վերցնի Կարապետյանից ու տա ուրիշ պետության, դեմ եմ»,- ասաց քաղաքացիներից մեկը՝ ակնարկելով թշնամի պետություններին։
Մի կին էլ նշեց, թե «չի հավատում, որ ՀԷՑ-ը ազգանացնելու մտադրությունը բխում է հօգուտ ժողովրդի ինչ-որ քայլ անելու ցանկությունից»։
Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների հայտարարությունները, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։ Փաշինյանը խիստ էր արձագանքել Կարապետյանի հայտարարությանը:
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Խուզարկության մեկնարկից մոտ ութ ժամ անց՝ գիշերը ժամը երեքին, Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Ինքը՝ գործարարը, չի ընդունում մեղադրանքը և մտադիր է բողոքարկել այն բոլոր ատյաններում։ Կարապետյանի մամուլի ծառայությունն այս մեղադրանքներն անվանել էր ակնհայտ վախեցնելու և բռնաճշման փորձ։
Հունիսի 19-ին դատարանը երկու ամսով կալանավորել էր Կարապետյանին:
Մանրամասները՝ տեսանյութում։
