Ֆրանսիայի նախագահ Էմանուել Մակրոնը և նրա կինը՝ Բրիջիտ Մակրոնը, նախատեսում են ԱՄՆ դատարանին ներկայացնել լուսանկարային և գիտական ապացույցներ, որպեսզի ապացուցեն, որ տիկին Մակրոնը կին է, հայտնում է BBC-ն:
Փաստաթղթերը ներկայացնում են աջակողմյան ազդեցիկ գործիչ Կանդես Օուենսի դեմ հայցի շրջանակներում այն բանից հետո, երբ նա համոզմունք էր հայտնել, թե Բրիջիտ Մակրոնը «ծնվել է որպես արական սեռի ներկայացուցիչ»։
Օուենսի փաստաբանները պատասխանել են հայցը չեղյալ համարելու միջնորդությամբ։
BBC-ի Fame Under Fire փոդքաստին տված հարցազրույցում գործով Մակրոնների փաստաբան Թոմ Քլարը նշել է, որ տիկին Մակրոնն այդ հայտարարությունները «ցավալի» է համարում: Ըստ նրա՝ դրանք «խանգարում են» Ֆրանսիայի նախագահին։
Քլարը նշել է, որ կլինեն «մասնագետների վկայություններ՝ գիտական բնույթի», և թեև այս պահին նա չի բացահայտել դրանց հստակ բնույթը, հավելել է, որ զույգը պատրաստ է ամբողջությամբ ապացուցել, որ այս պնդումները կեղծ են։
«Ցավալի է մտածել, որ ստիպված ես գնալ և ինքդ այդպիսի ապացույցներ ներկայացնել»,- ասել է նա։
Օուենսը 6,9 միլիոն հետևորդ ունի X հարթակում և 4,5 միլիոն՝ YouTube-ում։ Մակրոնների հայցի հիմքում նրա Becoming Brigitte անունով ութ մասից բացկացած փոդքաստն է, որն ունի ավելի քան 2,3 միլիոն դիտում։
