ՄԱԿ-ում Իրանի դեսպան Ամիր Սաիդ Իրավանին հայտարարել է, որ «Եվրաեռյակի» (Մեծ Բրիտանիա, Ֆրանսիա և Գերմանիա) միջուկային համաձայնագիրը «լի է անիրատեսական նախապայմաններով»:
Ավելի վաղ երեք երկրի ՄԱԿ-ի դեսպանները համատեղ հայտարարության մեջ առաջարկել էին հետաձգել պատժամիջոցների վերականգնումը մինչև վեց ամսով, եթե Իրանը թույլատրի ՄԱԳԱՏԷ-ի տեսուչների մուտքը միջուկային օբյեկտներ, լուծի հարստացված ուրանի պաշարների հարցը և սկսի բանակցություններ Միացյալ Նահանգների հետ:
«Նրանք առաջ են քաշում պայմաններ, որոնք պետք է լինեն բանակցությունների արդյունք, այլ ոչ թե մեկնարկային կետ, և նրանք գիտեն, որ այդ պահանջները չեն կարող կատարվել»,- Reuters-ը մեջբերում է Իրավանիի խոսքերը:
Դիվանագետը նշել է, որ եվրոպական երկրները պետք է դրա փոխարեն աջակցեն 2231 բանաձևի «կարճաժամկետ, անվերապահ տեխնիկական երկարաձգմանը», որը պաշտոնականացնում է Իրանի նկատմամբ պատժամիջոցների չեղարկման 2015 թվականի միջուկային համաձայնագիրը:
Իրավանին նաև աջակցել է Ռուսաստանի և Չինաստանի կողմից պատրաստված ՄԱԿ-ի Անվտանգության խորհրդի բանաձևի նախագծին՝ այն անվանելով «դիվանագիտությանը ավելի շատ ժամանակ տալու գործնական քայլ»: Նախագիծը նախատեսում է 2015 թվականի համաձայնագրի վեցամսյա երկարաձգում և կոչ է անում բոլոր կողմերին անհապաղ վերսկսել բանակցությունները:
Օգոստոսի 28-ին Մեծ Բրիտանիան, Ֆրանսիան և Գերմանիան սկսել էին Իրանի դեմ 2015 թվականի միջուկային համաձայնագրով չեղարկված պատժամիջոցների վերականգնման գործընթացը: Իրանը և «Եվրաեռյակը» նախկինում մի քանի փուլով միջուկային հարցով բանակցություններ էին վարել:
