Թաիլանդի և Կամբոջայի ներկայացուցիչները համաձայնության են եկել սահմանին լարվածությունը կարգավորելու վերաբերյալ։ Բանակցությունները տեղի են ունեցել Մալայզիայի մայրաքաղաք Կուալա Լումպուրում, հայտնել է ТАСС-ը։
«Թաիլանդի և Կամբոջայի միջև սահմանին իրավիճակի կարգավորման հանձնաժողովի նիստն ավարտվել է։ Կողմերը համաձայնության են եկել հրադադարի պահպանման վերաբերյալ 13 կետից բաղկացած համաձայնագրի շուրջ, երկու երկրների ներկայացուցիչները ստորագրել են սահմանին լարվածության կարգավորմանը և սահմանային գոտում խաղաղության վերականգնմանն ուղղված արձանագրություններ», - ասվում է Թաիլանդի կառավարության X-ի միկրոբլոգում հրապարակված հայտարարության մեջ։
Նշվում է, որ կողմերը համաձայնել են լիովին պահպանել հրադադարը սահմանի ողջ երկարությամբ։ Նրանք հրաժարվել են օգտագործել որևէ տեսակի զենք և որոշել են պահպանել զորքերի ներկայիս տեղակայումը՝ առանց ավելացնելու դրանց թվաքանակը։
Թաիլանդը և Կամբոջան նաև պատրաստակամություն են հայտնել սահմանային գոտիներ ուղարկել Մալայզիայի գլխավորությամբ ԱՍԵԱՆ դիտորդական առաքելություն։ Առաքելության խնդիրն է վերահսկել համաձայնագրի պայմանների կատարումը։ Բացի դրանից՝ կողմերը համաձայնել են մեկ ամսվա ընթացքում անցկացնել սահմանին իրավիճակի կարգավորման հանձնաժողովի նոր նիստ։
Հիշեցնենք, որ հուլիսի 24-ի առավոտյան երկու երկրների զորքերի միջև Թաիլանդի և Կամբոջայի սահմանին սկսվեցին թեժ մարտեր։ Հուլիսի 28-ին երկրները համաձայնեցին հրադադարի։
