Ուկրաինայի Գերագույն ռադան 289 կողմ և 1 դեմ ձայնով «Նաֆտոգազ Ուկրաինա» ընկերության գլխավոր տնօրեն Սերգեյ Կորեցկուն նշանակել է երկրի վարչապետ, գրում է ՌԲԿ-ն։
Այսպիսով՝ խորհրդարանը հաստատել է երկրի նախագահ Վոլոդիմիր Զելենսկու առաջադրած թեկնածությունը։ Մինչ քվեարկությունը՝ Կորեցկին պատգամավորների առջև ունեցած ելույթում հայտարարել է, որ իր ղեկավարած կառավարությունը պետք է դառնա «պաշտպանության, տնտեսական զարգացման և եվրոպական ինտեգրման կառավարություն»։
Առանցքային խնդիրների թվում նա մատնանշել է առաջիկա ձմռան նախապատրաստումն ու հաղթահարումը, բիզնեսի աջակցումը, գործընկերների հետ համագործակցության զարգացումը, միջազգային օգնության ներգրավումն ու Ուկրաինայի անդամակցությունը ԵՄ-ին։
«Ես պատրաստ եմ բարդ քայլերի։ Կարևորն այն է, որ դրանք նպաստեն կյանքի բարելավմանն ու կայունությանը»,- նշել է նա։
Կորեցկին, միևնույն ժամանակ, նախազգուշացրել է, որ առաջիկա ձմեռը կարող է ավելի բարդ լինել, քան նախորդը։ Նրա խոսքով՝ կառավարությունը դեռևս չունի գործողությունների հստակ ծրագիր, սակայն ինքը կզբաղվի դրա մշակմամբ նշանակումից անմիջապես հետո։ Մոտ ժամանակներս նորանշանակ վարչապետը կներկայացնի նախարարների կաբինետի նոր կազմն ու թարմացված ծրագիրը։
Կառավարության կազմի թարմացման պլանների մասին Զելենսկին հայտարարել էր հուլիսի 12-ին՝ նշելով, որ դա պայմանավորված է «քաղաքական ռազմավարության» փոփոխությամբ, ըստ որի՝ յուրաքանչյուր առաջնահերթ արտաքին քաղաքական ուղղության համար պատասխանատու է լինելու մեծ փորձ ունեցող կոնկրետ անձ։ Առաջնահերթությունների թվում նախագահը նշել էր հարաբերություններն ԱՄՆ-ի (այդ թվում՝ Patriot համակարգերի արտադրության լիցենզիաների շուրջ պայմանավորվածությունները), ԵՄ-ի, Լեհաստանի, Հունգարիայի, Մերձավոր Արևելքի, Պարսից ծոցի երկրների և Չինաստանի հետ։
Իր հերթին՝ ՌԴ նախագահ Վլադիմիր Պուտինը Գերագույն ռադան անվանել էր Ուկրաինայի միակ լեգիտիմ իշխանությունը։ Նրա խոսքով՝ հենց խորհրդարանի նախագահն է ունակ մասնակցել խաղաղ բանակցություններին, մինչդեռ Զելենսկին՝ «իր ոչ լեգիտիմ լինելու պատճառով», որևէ փաստաթուղթ ստորագրելու իրավունք չունի։
Հուլիսի 14-ին Գերագույն ռադան կողմ ձայների 259 մեծամասնությամբ հաստատել էր վարչապետ Յուլյա Սվիրիդենկոյի և կառավարության կազմի հրաժարականը։ Սվիրիդենկոն գործադիրը ղեկավարում էր 2025 թվականի հուլիսի 17-ից։
