Կազմակերպիչները չեղարկել են հունիսի 19-ին Խորժովի «Սլասկի» մարզադաշտում նախատեսված ռեփեր Քանյե Ուեսթի համերգը, հայտնում է ՏԱՍՍ-ը:
Նշվում է, որ դա տեղի է ունեցել, երբ Լեհաստանի մշակույթի նախարար Մարտա Չենկովսկան սպառնացել է արգելել հայտնի երաժշտի մուտքը երկիր: Մարզադաշտի տնօրեն Ադամ Ստրժիզևսկին հայտնել է, որ համերգը չի կայանա «տեխնիկական և իրավական պատճառներով»։
Լեհաստանի մշակույթի նախարարի խոսքով՝ լեհական իշխանությունները լիազորված են արգելել երաժշտի մուտքը:
«Ես չեմ կարող պատկերացնել, որ Լեհաստանում՝ մի երկրում, որտեղ մարդիկ սպանվել են նացիստական Գերմանիայի մահվան ճամբարներում, կարող ենք կազմակերպել համերգ արտիստի կողմից, որը բացահայտորեն և անկեղծորեն հայտարարում է իր կապվածության մասին Հիտլերի հետ և տարածում է նացիստական գաղափարախոսությունը: Սա ատելության խոսք է, և Լեհաստանում ոչ մի համերգի կազմակերպիչ չպետք է նպաստի դրան»,- ասել էր Չենկովսկան։
Ավելի վաղ հայտարարվել էր, որ արտիստի համերգը Մարսելի «Ստադ Վելոդրոմ» մարզադաշտում հետաձգվել է, և նրան արգելվել է մուտք գործել Մեծ Բրիտանիա: Միևնույն ժամանակ, Նիդեռլանդների իշխանությունները, որտեղ Ուեսթը հունիսի սկզբին պետք է երկու համերգ ունենա, հայտարարել են, որ իրենք իրավական հիմք չեն գտել ամերիկացի ռեփերին արգելելու համար, չնայած հրեական կազմակերպությունների և խորհրդարանի որոշ անդամների կոչերին՝ կանխելու նրա ելույթները երկրում։
Վերջին տարիներին ռեփերը պարբերաբար հակասություններ է առաջացրել իր հայտարարություններով, մասնավորապես՝ նացիզմի և ստրկության թեմաներով, երբեմն նույնիսկ բացահայտորեն ցուցադրելով նացիստական խորհրդանիշներ: 2025 թվականի մայիսին նա թողարկել էր երգ, որի կրկներգը նացիստական ողջույն պարունակող արտահայտություն է։
