ԱՄՆ նախագահ Դոնալդ Թրամփը մեկ տարով երկարաձգել է Ռուսաստանի դեմ որոշակի պատժամիջոցներ, հայտնում է ՏԱՍՍ-ը՝ վկայակոչելով ԱՄՆ կառավարության պաշտոնական փաստաթղթերի ժողովածու՝ Federal Register-ում ներկայացված ծանուցումը։
Պատժամիջոցները սահմանվել են, մասնավորապես, Ռուսաստանի կողմից ԱՄՆ ընտրական գործընթացներին ենթադրյալ միջամտության և Ուկրաինայում ռազմական գործողության մեկնարկից հետո։
Փաստաթղթի համաձայն՝ այս սահմանափակումները սահմանվել են 2021 թվականի ապրիլի 15-ին ստորագրված գործադիր հրամանագրի համաձայն և հետագայում խստացվել են։ Սա արվել է Ռուսաստանի «չարամիտ գործունեության» պատրվակով, որը վերաբերում է «ազատ և ժողովրդավարական ընտրություններին խոչընդոտելուն և Միացյալ Նահանգներում, նրա դաշնակիցների և գործընկերների շրջանում ժողովրդավարական ինստիտուտների խաթարմանը», ինչպես նաև «Միացյալ Նահանգների, նրա դաշնակիցների և գործընկերների դեմ ուղղված չարամիտ կիբերհարձակումներին մասնակցելուն»։
Ծանուցագրում նշվում է, որ Ռուսաստանի գործունեությունն «անսովոր և արտակարգ սպառնալիք է ներկայացնում Միացյալ Նահանգների ազգային անվտանգության, արտաքին քաղաքականության և տնտեսության համար»։
«Այս պատճառով, 14024 գործադիր հրամանագրով հայտարարված արտակարգ դրությունն ուժի մեջ կմնա 2026 թվականի ապրիլի 15-ից հետո»,- ասվում է ԱՄՆ նախագահի հայտարարության մեջ։
Թրամփն ԱՄՆ Կոնգրեսին տեղեկացրել է պատժամիջոցների ռեժիմի երկարաձգման մասին։
