Իսրայելն ու Իրանը շարունակում են փոխանակվել ավիահարվածներով՝ ԱՄՆ նախագահ Դոնալդ Թրամփի հայտարարությունների ֆոնին, թե կողմերի միջև բանակցություններ են ընթանում։ Թեհրանը, սակայն, հերքում է բանակցությունների փաստը, հայտնում է Reuters-ը։
Իրանի ղեկավարությունը հայտարարել է, որ չի կարող բանակցել ԱՄՆ-ի հետ, քանի որ Վաշինգտոնը վերջին երկու տարվա ընթացքում երկու անգամ հարվածել է Իրանին բարձր մակարդակի բանակցությունների ընթացքում։
Թրամփի հայտարարությունից հետո, թե ԱՄՆ-ն Իրանին փոխանցել է 15 կետից բաղկացած համաձայնագիր, Իրանի «Խաթամ ալ-Անբիա» կենտրոնական շտաբի ներկայացուցիչը ծաղրել է ԱՄՆ նախագահին՝ նշելով, որ նա փորձում է «Իրանից կրած ռազմական պարտությունը ներկայացնել որպես համաձայնություն»։ Թեհրանը հայտարարել է, որ երբեք չի գնա փոխզիջման ագրեսորի հետ, հաղորդում է Tasnim-ը։
Axios-ը, հղում անելով աղբյուրներին, գրում է, որ ԱՄՆ-ն և տարածաշրջանային միջնորդներն սպասում են Թեհրանի պատասխանին՝ բարձր մակարդակով խաղաղ բանակցություններ անցկացնելու առաջարկի վերաբերյալ։
Reuters-ի տվյալներով՝ իսրայելցի պաշտոնյաները քիչ հավանական են համարում, որ Իրանը կհամաձայնի ԱՄՆ-ի պահանջներին, քանի որ դրանք, հավանաբար, կվերաբերեն Իրանի միջուկային և հրթիռային ծրագրերին։
Պակիստանը հայտարարել է, որ պատրաստ է հարթակ տրամադրել ԱՄՆ-ի և Իրանի միջև բանակցությունների համար։ Երկրի բանակի գլխավոր հրամանատար Ասիմ Մունիրը մարտի 22-ին զրուցել էր Թրամփի հետ, իսկ վարչապետ Շեհբազ Շարիֆը հաջորդ օրը բանակցել էր Իրանի նախագահ Մասուդ Փեզեշքիանի հետ, գրում է The Guardian-ը։
Թուրքիան ևս քննարկել է պատերազմը դադարեցնելու հնարավորությունները Սաուդյան Արաբիայի, Եգիպտոսի և Պակիստանի հետ։ Այս շփումները տեղի են ունեցել Թուրքիայի ԱԳ նախարար Հաքան Ֆիդանի՝ ամերիկացի պաշտոնյաների և Իրանի ԱԳ նախարար Աբբաս Արաղչիի հետ հանդիպումներից հետո, հայտնում է Al-Monitor-ը։
Mehr գործակալության տվյալներով՝ Փեզեշքիանն ու Ֆրանսիայի նախագահ Էմանուել Մակրոնը հեռախոսազրույց են ունեցել՝ տարածաշրջանում լարվածությունը նվազեցնելու հարցով։
Թեհրանը նաև հայտարարել է, որ ակնկալում է ՄԱԿ Անվտանգության խորհրդի անդամներից՝ հատկապես Ռուսաստանից և Չինաստանից, կոշտ դիրքորոշում ԱՄՆ-ի և Իսրայելի գործողությունների վերաբերյալ։ Չինաստանը հաստատել է, որ դատապարտում է Իրանի դեմ հարվածները և երկրի ինքնիշխանության խախտումը։
Թրամփը բազմիցս հայտարարել է, որ Թեհրանն ինքն է խնդրել բանակցություններ, պատրաստ է զիջումների և քննարկում է Վաշինգտոնի առաջարկած 15 կետից բաղկացած փաստաթուղթը, հաղորդում է ABC News-ը։
Իրանը, իր հերթին, պնդել է, որ Թրամփի հայտարարությունները չեն համապատասխանում իրականությանը և միտված են միայն նավթային շուկաները հանգստացնելուն, գրում է The Guardian-ը։
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ Ալի Խամենեիի մահը:
