Bars Media կինոստուդիան մտահոգություն է հայտնել կինոռեժիսոր Ռոջհիլաթ Աքսոյի դեմ Թուրքիայում ներկայացված դատական մեղադրանքների առթիվ՝ «Ավրորայի արևածագը» ֆիլմի ցուցադրությունը Դիարբեքիրում կազմակերպելու համար:
«Ռոջհիլաթը, որը որևէ կերպ կապված չէ մեր ֆիլմի արտադրության հետ, անհիմն հետապնդման է ենթարկվում Թուրքիայի քրեական օրենսգրքի 301-րդ հոդվածով՝ «թուրքական ազգին և պետական հաստատություններին հրապարակայնորեն վիրավորելու» համար»,- ասվում է հաղորդագրության մեջ։
Bars Media-ն շեշտել է, որ արվեստին և պատմությանը պետք է մոտենալ քննադատական մոտեցմամբ, այլ ոչ թե բանտարկության սպառնալիքով։ Կինոստուդիան կոչ է արել միջազգային կինոհանրությանը և մարդու իրավունքների կազմակերպություններին աջակցել Աքսոյին և ընդհանուր պատմության մասին պատմություններ մատուցելու իրավունքին։
«Ավրորայի արևածագը» փաստագրական ֆիլմ է, որը հիմնված է Հայոց ցեղասպանությունը վերապրած Արշալույս «Ավրորա» Մարդիգանյանի իրական վկայության վրա: Այն համատեղում է անիմացիան «Հոգիների աճուրդ» համր ֆիլմի 1919 թվականի հազվագյուտ արխիվային կադրերի և Ավրորայի հետ հարցազրույցների հետ։
Այս ֆիլմն ստեղծվել է երկխոսությունը խթանելու և ամենամութ ժամանակներում գոյություն ունեցող դիմադրողականությունն ու կարեկցանքն ընդգծելու համար. փաստաթղթավորված հանցագործությունները պատկերելիս ֆիլմը նաև ցույց է տալիս թուրքերի և քրդերի սովորական բարության դրսևորումները, որոնք փրկել են Ավրորայի կյանքը։
