Երկուշաբթի օրը չինական ռմբակոծիչների մի խումբ թռիչքներ է իրականացրել Թայվանի մոտակայքում՝ զորքերի մարտական պատրաստվածությունն ստուգելու համար, հայտնել է «Ինտերֆաքս»-ը։
Ըստ հրապարակման՝ թռիչքներն իրականացվել են «Արդար առաքելություն 2025» զորավարժությունների շրջանակներում։
Ժողովրդա-ազատագրական բանակի Արևելյան գոտու մարտական հրամանատարության խոսնակ Շի Յին ասել է, որ զորավարժությունները ներառում էին հեռահար ռմբակոծությունների և ճշգրիտ հարվածների վարժանքներ՝ զորքերի հեռավոր տարածքներում մարտական գործողություններ իրականացնելու կարողությունն ստուգելու համար։
Զորավարժությունները կենտրոնացած են նավ-ինքնաթիռ համակարգման կատարելագործման, ռազմածովային թիրախների դեմ հարվածների վարժանքների և Թայվանի հարավ-արևելքում գտնվող ջրերում և օդային տարածքում հեռահար ռմբակոծությունների իրականացման վրա։ Ժողովրդա-ազատագրական բանակի հրթիռային ստորաբաժանումները մոդելավորում են տարածաշրջանի հիմնական թիրախների դեմ հարվածներ։
Լրատվամիջոցների հարցումներին ի պատասխան՝ Պետական խորհրդի Թայվանի հարցերով գրասենյակի խոսնակ Չեն Բինհուան նշել է, որ երկուշաբթի սկսված զորավարժությունների նպատակն է զսպել Թայվանի անկախությունը պաշտպանող և Թայվանի նեղուցում խաղաղությանն ու կայունությանը լրջորեն սպառնացող արտաքին ուժերի միջև կնքված համաձայնությունը։
Բինհուայի խոսքով՝ զորավարժությունները, որոնց մասնակցում են Չինաստանի արևելյան գոտու մարտական հրամանատարության տարբեր ուժեր, ուղղված են չինացի ազգի հիմնարար շահերը և թայվանցի հայրենակիցների շահերը պաշտպանելու պատրաստակամության ամրապնդմանը։
Բինհուան նաև զգուշացրել է, որ Թայվանի անկախությանն ուղղված անջատողական գործողությունների ցանկացած փորձ կհանդիպի ջախջախիչ հարվածի։ Նա ընդգծել է, որ ազգային վերամիավորման պատմական միտումն անշրջելի է՝ հավելելով, որ ոչ ոք չպետք է թերագնահատի չինացի ժողովրդի ուժեղ վճռականությունը և ազգային ինքնիշխանությունն ու տարածքային ամբողջականությունը պաշտպանելու հսկայական կարողությունը։
Մամուլը դեկտեմբերի 29-ին հայտնել էր, որ Չինաստանը Թայվանի շուրջ լայնածավալ զորավարժություններ է սկսել՝ մշակելով կղզու առանցքային շրջանների արգելափակման և գրավման սցենարներ։
Պեկինը Թայվանը համարում է իր տարածքի մի մասը և պնդում է «խաղաղ վերամիավորման» մասին՝ չբացառելով ուժի կիրառումը: Թայվանի նեղուցում լարվածությունն ուժեղացել է Թայվանին շուրջ 11 մլրդ դոլարի սպառազինություն վաճառելու մասին ԱՄՆ-ի որոշումից հետո, ինչն առաջացրել է Չինաստանի իշխանությունների կտրուկ արձագանքը:
