Ռուսաստանի և ԱՄՆ նախագահներ Վլադիմիր Պուտինը և Դոնալդ Թրամփն այսօր հեռախոսազրույց են ունեցել, հայտնել է Պուտինի օգնական Յուրի Ուշակովը։ Զրույցից հետո նրա մեկնաբանությունները հրապարակվել են Կրեմլի մամուլի ծառայության կողմից։
Ուշակովը նշել է, որ Թրամփը և նրա խորհրդականները ռուսական կողմին մանրամասնորեն ներկայացրել են դեկտեմբերի 28-ին Մար-ա-Լագոյում ուկրաինական պատվիրակության հետ կայացած բանակցությունների հիմնական արդյունքները։ Ռուսաստանի նախագահի օգնականի խոսքով՝ Պուտինը Թրամփի ուշադրությունը հրավիրել է այն փաստի վրա, որ բանակցություններից անմիջապես հետո ուկրաինական կողմը հարձակում է սկսել «հեռահար անօդաչու թռչող սարքերի լայնածավալ օգտագործմամբ՝ Նովգորոդի մարզում գտնվող Ռուսաստանի նախագահական նստավայրի վրա»։
«ԱՄՆ նախագահը ցնցված էր այս լուրից, բառացիորեն վրդովված։ Նա ասել է, որ նույնիսկ չէր կարող պատկերացնել նման խելագար գործողություններ։ Եվ, ինչպես արդեն ասվել է, սա, անկասկած, կազդի ամերիկյան մոտեցման վրա՝ Ուկրաինայի նախագահ Վլադիմիր Զելենսկու հետ աշխատանքի համատեքստում, որին ներկայիս վարչակազմը, ինչպես Թրամփն ինքն էր ասել, փառք Աստծո, «Տոմահավկ» հրթիռներ չի տվել»,- ասել է Ուշակովը։
Նրա խոսքով՝ ռուսական կողմը հայտարարել է, որ Կիևի նման գործողություններն «անպատասխան չեն մնա»։ Պուտինը նաև ընդգծել է, որ «Ռուսաստանի դիրքորոշումը կվերանայվի նախորդ փուլում ձեռք բերված մի շարք համաձայնությունների և ի հայտ եկող լուծումների վերաբերյալ»։
Ավելի վաղ Ռուսաստանի արտաքին գործերի նախարար Սերգեյ Լավրովը հայտարարել էր, որ դեկտեմբերի 29-ի գիշերն ուկրաինական կողմը, օգտագործելով 91 հեռահար անօդաչու թռչող սարք, փորձել է հարձակվել Նովգորոդի մարզում գտնվող Ռուսաստանի նախագահի նստավայրի վրա։
«Նման անխոհեմ գործողություններն անպատասխան չեն մնա։ Որոշվել են պատասխան հարվածների թիրախները և Ռուսաստանի զինված ուժերի կողմից դրանց իրականացման ժամկետները»,- Լավրովի խոսքերն է մեջբերում «Ինտերֆաքսը»։
Նախարարը հավելել էր, որ ռուսական կողմը մտադիր չէ դուրս գալ Միացյալ Նահանգների հետ բանակցային գործընթացից, սակայն բանակցային դիրքորոշումները կվերանայվեն։
