Կարկուտը մեծ վնասներ է տվել գյուղատնտեսությանը, որոնք գույքագրում ենք, կառավարության նիստից հետո լրագրողներին հայտնել է ՀՀ էկոնոմիկայի նախարար Գևորգ Պապոյանն՝ անդրադառնալով մայիսի 13-ից 14-ը Հայաստանի մարզերում գրանցված տեղումների հետևանքներին։
Նա տեղեկացրել է, որ վնասներ են կրել հատկապես Արարատի, Արագածոտնի, Արմավիրի մարզերը։ Պապոյանը նշել է, որ այցելել է Արարատի մարզ, իսկ շաբաթ օրը պլանավորում է գնալ նաև Արագածոտն։ Նախարարի խոսքով՝ գյուղացիներին օգնություն տրամադրելու որոշումներ կարող են ընդունել միայն կարկուտի պատճառած վնասները գույքագրելուց հետո։
«Վնասների գույքագրման համար մեր աշխատանքային խմբերն ակտիվորեն աշխատում են համայնքների, այլ նախարարությունների խմբերի հետ»,- հավելել է Պապոյանը։
Նա ընդգծել է, որ կան դեպքեր, երբ հակակարկտային կայանների արդյունավետությունը միանշանակ չէ։
«Հակակարկտային կայաններն աշխատում են, բայց կա գիտականորեն ապացուցված փաստ՝ կան ամպեր, որոնց դեմ այդ թնդանոթային համակարգերի արդյունավետությունը 100 տոկոսանոց չէ։ Կան նաև ամպեր, որոնց դեպքում արդյունավետությունը 100 տոկոսանոց է, և փրկում են իրավիճակը»,- ընդգծել է նախարարը։
Մայիսի 13-14-ը Հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանը կարկուտի տեսանյութեր էր հրապարակել Արմավիրի մարզի Նալբանդյան-Ջանֆիդա, Արարատի մարզի Քացրաշեն, Նորաշեն գյուղերից, ինչպես նաև Արագածոտնի Աղձք գյուղից։
