«Ինտերի» կիսապաշտպան, Հայաստանի ֆուտբոլի ազգային հավաքականի նախկին ավագ Հենրիխ Մխիթարյանի՝ ընտրանուց հեռանալու պատճառներից մեկն այն է, որ նրա մայրը՝ Մարինա Թաշչյանը, զրկվել է Հայաստանի ֆուտբոլի ֆեդերացիայում աշխատելու հնարավորությունից, 168.am-ին տված հարցազրույցում ասել է ՀՖՖ նախկին նախագահ Ռուբեն Հայրապետյանը։
«Թաշչյանը պատահական մարդ չէ ֆուտբոլում: Մխիթարյանի մայրը ֆեդերացիայի 4 նախագահի հետ է աշխատել: Իմ նախագահության տարիներին 4-5 անգամ ցանկացել է ազատվել աշխատանքից. ես եմ իրեն համոզել, որ մնա, աշխատի: Թաշչյանի նման աշխատող այսօր ֆեդերացիայում չկա: 5-6 տղամարդու աշխատանք էր կատարում: Այդ կարգի աշխատասեր կին ես Հայաստանում շատ քիչ եմ պատկերացնում»,- ասել է Հայրապետյանը:
ՀՖՖ նախկին ղեկավարը հավելել է, որ Հայաստանի իշխանությունները Մխիթարյանին զրկել են դիվանագիտական անձնագրից, որի շնորհիվ ֆուտբոլիստն առանց դժվարությունների մեկնում էր Եվրոպա։
Հայրապետյանը նաև մեկնաբանել է Մխիթարյանի դեմ սոցցանցերում այն հրապարակումները, երբ ֆուտբոլիստը հունվարին չէր եկել Հայաստան՝ վարչապետ Նիկոլ Փաշինյանի կողմից մրցանակ ստանալու և ներկայացուցիչ չէր ուղարկել։ Մխիթարյանը հայտարարել էր, որ մոտ ժամանակներս չի վերադառնա հավաքական, ինչից հետո արժանացել էր քննադատության։ «Հանուն հանրապետության» կուսակցության նախագահ Արման Բաբաջանյանն ազգային հավաքականը դասել էր հայրենիքի հետ նույն հարթության վրա և մարզիկին կոչ էր արել չնեղանալ իր երկրից։ Ֆեյսբուքյան այս գրառումը հավանել էր Միջազգային իրավական հարցերով Հայաստանի ներկայացուցիչ Եղիշե Կիրակոսյանը։
ՀՖՖ նախկին նախագահն անհեթեթ է համարել, որ մարդիկ, ովքեր «իրենց երկրին ոչ մի օգուտ չեն բերել», փորձում են Մխիթարյանին սովորեցնել սիրել հայրենիքը, մինչդեռ ֆուտբոլիստը բազմիցս զբաղվել է բարեգործությամբ, այդ թվում՝ օգնելով Արցախում վիրավոր զինվորներին։
«Դեռ 20-21 տարեկանից, երբ Մխիթարյանը բազմաթիվ բարեգործություններ էր անում, Բաբաջանյանն իր հարազատ մոր դեմ ցուցմունք էր տալիս: Ես կդադարեի հարգել Մխիթարյանին, եթե նա շարունակեր աշխատել ՀՖՖ ղեկավարության հետ, երբ իր մոր նկատմամբ նման կերպ են վարվել: Չէ՞ որ հավաքականի ֆուտբոլիստ լինելը, առավել ևս՝ ավագի թևկապ կրելն աշխատանք է: Նա ո՞նց պիտի աշխատեր այն մարդկանց հետ, ովքեր իր մորը չեն թողնում մտնել ֆեդերացիայի շենք»,- ասել է Հայրապետյանը:
ՀՖՖ նախկին ղեկավարն ընդգծել է, որ երազում է Մխիթարյանին կրկին տեսնել հավաքականում՝ թե՛ ավագի, թե՛ ֆեդերացիայի նախագահի պաշտոնում։
«Հենրիխը նեղացկոտ չէ, ոչ էլ որևէ մեկից նեղացել է: Ուղղակի շատ լավ գիտակցում է՝ ֆեդերացիան կարող է այնպիսի մթնոլորտ ստեղծել իր համար, որ ինքը պարզապես չկարողանա ֆուտբոլ խաղալ, ինչպես որ արել էին: Հենրիխը չի հրաժարվել հավաքականից. նա հրաժարվել է այն մթնոլորտից, որն ստեղծվել է իր շուրջ»,- ասել է Հայրապետյանը:
Նա ընդգծել է, որ հայկական ֆուտբոլի զարգացումը հնարավոր է միայն Արմեն Մելիքբեկյանի՝ ՀՖՖ ղեկավարի պաշտոնից հեռանալուց հետո։
2022 թվականի մարտի 3-ին Մխիթարյանը հայտարարել էր Հայաստանի հավաքականում կարիերան ավարտելու մասին։ 2023 թվականի դեկտեմբերին նա պաշտպանել էր Արաս Օսբիլիսի թեկնածությունը Հայաստանի ֆուտբոլի ֆեդերացիայի ղեկավարի պաշտոնում՝ հակադրվելով ՀՖՖ ներկայիս նախագահ Արմեն Մելիքբեկյանին։ Փետրվարի 4-ին Մխիթարյանը հայտարարել էր, որ «կգա մի օր, երբ բոլորը կիմանան ճշմարտությունը» Հայաստանի ֆուտբոլի ֆեդերացիայի հետ իր հարաբերությունների և ազգային հավաքականից հեռանալու պատճառների մասին։
Հունվարին ԿԳՄՍՆ-ն Մխիթարյանին ճանաչել էր Հայաստանը միջազգային ասպարեզում լավագույնս ներկայացնող մարզիկ։ Հունվարի 31-ին Մխիթարյանը չէր ներկայացել Փաշինյանի մասնակցությամբ 2024 թվականի լավագույն մարզիկների պարգևատրման արարողությանը։ Ավելի վաղ ֆուտբոլիստն աջակցություն էր հայտնել Արցախի նախկին պետնախարար Ռուբեն Վարդանյանին և պահանջել էր ազատել հայ գերիներին։
