ՀՀ-ում ԱՄՆ դեսպանատունը սեպտեմբերի 2-ից կներդնի ԱՄՆ վիզայի հարցազրույցից ազատման ծրագրի նոր կանոններ, հաղորդում է Երևանում ԱՄՆ դիվանագիտական առաքելության մամուլի ծառայությունը:
Այն անձինք, որոնց նախորդ վիզայի ժամկետը լրացել է վերջին 12 ամսվա ընթացքում, կկարողանան դիմել նոր B-1, B-2 կամ B1/B2 վիզայի համար (գործում է 10 տարի): Հարցազրույցից ազատումը կարող է տրամադրվել, եթե դիմողը նախորդ վիզայի տրամադրման պահին եղել է առնվազն 18 տարեկան:
14 տարեկանից փոքր և 79 տարեկանից բարձր դիմողները պետք է անձամբ ներկայանան հյուպատոսի հետ հարցազրույցի, հավելել է դեսպանատունը: Ծրագրին մասնակցելու համար պետք է լինել նաև Հայաստանի քաղաքացի և մշտապես բնակվել հանրապետությունում, իսկ Իրանի և Սիրիայի քաղաքացիները անձամբ հարցազրույց կանցնեն՝ անկախ վիզայի կատեգորիայից կամ երկարաձգման կարգավիճակից:
Դեսպանատունը նշել է, որ հարցազրույցից ազատման պայմաններին համապատասխանելը ինքնաշխատորեն չի նշանակում վիզա ստանալ. հյուպատոսական պաշտոնյան կարող է իր հայեցողությամբ ձեզ կանչել հարցազրույցի:
Ավելի վաղ դեսպանատունը զգուշացրել էր, որ ՀՀ քաղաքացիների՝ ԱՄՆ վիզաները կարող են չեղյալ համարվել, եթե ստուգումների ընթացքում հայտնաբերվեն օրենքի խախտումներ։
