«Առյուծ արքայի» համաշխարհային դրամամուտքերը հասել են 1.33 մլրդ դոլարի, որի շնորհիվ այն, BoxOfficeMojo կայքի տվյալների համաձայն, դարձել է ամենահաջողակ անիմացիոն ֆիլմը պատմության մեջ:
Նախորդ ռեկորդը 2013 թվականին սահմանել էր «Սառը սիրտը» մուլտֆիլմը՝ 1.29 մլրդ դոլար: Երրորդ տեղում է «Սուպերյոթնյակ 2»-ը (2018 թվական, 1.24 մլրդ դոլար), չորրորդ տեղում «Մինյոններն» են (2015 թվական, 1.16 մլրդ դոլար): Ցուցակի հինգերորդ տեղն զբաղեցնում է «Խաղալիքների պատմությունը. մեծ փախուստ» (2010 թվական, 1.07 մլրդ դոլար): Մուլտֆիլմի դրամամուտքերը 1994 թվականին կազմել են 987 մլն դոլար։
Հիշեցնենք, որ առաջին «Առյուծ արքան» էկրաններին է բարձրացել 1994 թվականին: Հենց այդ ժամանակ էլ հանդիսատեսը սիրահարվում է փոքրիկ կատվին՝ Սիմբային, ով էլ հետո դառնալու էր հովիտների թագավորը: 25 տարի անց առյուծի պատմությունը շարունակում է ոգեշնչել նկարիչներին:
Պատմությունը մնացել է նույնը, ինչը հանդիսատեսի կողմից դիտվել է որպես առավելություն, քանի որ հին հերոսներն ու հատկապես սյուժեն սիրվել էր միլիոնավոր մարդկանց կողմից:
