«Ուժեղ Հայաստանում» համաներում լինելու է, Ֆեյսբուքի իր էջում գրել է «Ուժեղ Հայաստան» կուսակցության խորհրդի անդամ Նարեկ Կարապետանը։
Մարտին ՀՀ վարչապետ Նիկոլ Փաշինյանը, պատասխանելով համաներման հնարավորության մասին հարցին, հայտարարել էր, որ ավանդական համաներումներ չեն նախատեսվում։ Դրանց փոխարեն կիրառվելու է պատժի կրման անհատականացված մոտեցումը։ Վարչապետի խոսքով՝ շեշտը դրվելու է պայմանական վաղաժամկետ ազատման գործող համակարգի կատարելագործման և կալանավորների վարքագծի վրա։
«Ուժեղ Հայաստան» կուսակցության առաջնորդ, «Տաշիր» ընկերությունների խմբի նախագահ Սամվել Կարապետյանի միջազգային փաստաբան Ռոբերտ Ամստերդամը հայտարարել էր, որ շարունակելու են միջազգային հանրությանը հետևողականորեն ներկայացնել փաստեր՝ մինչև չդադարեցվի Կարապետյանի և մյուս քաղբանտարկյալների նկատմամբ կիրառվող հալածանքը և չվերականգնվի արդարությունը։
2025 թվականի հոկտեմբերին Սամվել Կարապետյանը դատապարտել էր Հայաստանում քաղաքական դրդապատճառներով կալանավորումները և հայտարարել է, որ «ոչ մի բանտարկություն չի կարող կոտրել այսօրվա բազմաթիվ քաղբանտարկյալների կամքը՝ ապրելու բռնապետությունից ու օտարի ազդեցությունից ազատ, իրական քրիստոնեական արժեքներով առաջնորդվող, արժանապատվությունը վերականգնած, բարեկեցիկ քաղաքացիների Հայաստանում»։
Հունվարին Նարեկ Կարապետյանը ներկայացրել էր Սամվել Կարապետյանի կողմից առաջարկված տնտեսական զարգացման հայեցակարգը։ Այն բաղկացած է հինգ առանցքային քայլից, որոնք, ըստ նախաձեռնողների, կապահովեն Հայաստանի տնտեսական թռիչքն ու ժողովրդագրական կայունությունը։
