Օկուպացված Ստեփանակերտի կենտրոնում ոչնչացվել է Արցախի հերոս Աշոտ Ղուլյանի (Բեկոր) հուշարձանը, հայտնել են Արցախի մշակութային և զբոսաշրջության զարգացման գործակալությունից։
Նշվում է, որ Ղուլյանի հուշարձանը, որն ստեղծվել էր հայտնի հայ քանդակագործ Յուրի Սամվելյանի կողմից, տեղադրվել էր 1996 թվականին՝ նրա թաղման վայրում՝ նույնանուն զբոսայգում։ Ավելի շուտ հերոսի մասունքները տեղափոխվել էին նրա ծննդավայր Խնձրիստան, սակայն այսօր նրա գերեզմանի վիճակի մասին տեղեկություններ չկան։
«Հուշարձանների ոչնչացումը ոչ միայն վանդալիզմ է, այլև Ադրբեջանի համակարգված քաղաքականություն, որն ուղղված է Արցախի ժողովրդի հերոսների հիշողությունն ու մշակութային ինքնությունը ջնջելուն։ Այսպիսի գործողությունները կոպտորեն խախտում են մշակութային ժառանգության պաշտպանության միջազգային կոնվենցիաները և արցախցիների իրավունքները՝ հիշողությունը, պատմությունը պահպանելու և իրենց հայրենիք վերադառնալու»,- ասված է հայտարարության մեջ։
Նշվում է, որ Ադրբեջանի պատասխանատվությունը մշակութային ժառանգության ոչնչացման համար պետք է արձանագրվի միջազգային հանրության կողմից։
Ավելի վաղ հայտնի էր դարձել, որ ադրբեջանցիները հուլիսի 15-ի դրությամբ՝ ոչնչացրել էին օկուպացված Ստեփանակերտում գտնվող բոլոր 25 հուշարձաններն ու կիսանդրիները։
2023 թվականի սեպտեմբերից ի վեր Ադրբեջանը հողին է հավասարեցրել Արցախում չորս գյուղ և ոչնչացրել մի քանի տասնյակ մշակութային հուշարձաններ, այդ թվում՝ ավելի քան 10 եկեղեցի, գրեթե 50 հուշահամալիր, քանդակներ և խաչքարեր: Armenia Today-ը տեղեկություններ է հավաքել Լեռնային Ղարաբաղի տարածքում ոչնչացված պատմական և մշակութային նշանակության բոլոր հուշարձանների մասին, որոնք դարձել են Բաքվի կողմից իրականացվող մշակութային ցեղասպանության քաղաքականության զոհ։
