Նույնիսկ Լեռնային Ղարաբաղում հայերի էթնիկ զտումից հետո Հայաստանը խաղաղության ձեռք է մեկնել Ադրբեջանին՝ առաջարկելով փակել թշնամության էջը և խաղաղության համաձայնագրի կնքմամբ քաղաքակիրթ հարաբերություններ հաստատել, Բելգիայի Ներկայացուցիչների պալատում հայտարարել է Բելգիայում ՀՀ դեսպան Տիգրան Բալայանը։
Նա այս մասին նշել է Արտաքին հարաբերությունների հանձնաժողովում տեղի ունեցած «Հարավային Կովկասում խաղաղության հաստատման անհրաժեշտության մասին» բանաձևի լսումների ժամանակ։
«Հայաստանը մշտապես հայտնել է Ադրբեջանի հետ խաղաղ ապրելու իր պատրաստակամությունը՝ նույնիսկ 2023 թվականին Լեռնային Ղարաբաղում տեղի ունեցած էթնիկ զտումներից հետո: Այս համատեքստում հատկապես ուշագրավ է անցյալ ամիս խաղաղության պայմանագրի նախագծի շուրջ բանակցությունների ավարտը»,- ասել է դեսպանը։
Նա շեշտել է, որ Ադրբեջանը Հայաստանի խաղաղ մտադրությունները փոխադարձելու փոխարեն՝ շարունակում է ավելի ագրեսիվ արհեստական նախապայմաններ հորինել, ինչպես, օրինակ, Հայաստանի սահմանադրության փոփոխության անհրաժեշտությունը և մի շարք այլ մտացածին նախապայմաններ, որոնք ցույց են տալիս, որ Բաքուն խաղաղության հասնելու քաղաքական կամք չունի։
«Խաղաղության մեր կառուցողական առաջարկներից ոչ մեկը, ինչպիսիք են կապի, տրանսպորտի և ենթակառուցվածքների ապաշրջափակումը, կամ սպառազինությունների վերահսկման և սահմանային միջադեպերի ստուգման երկկողմանի մեխանիզմը, դրական արձագանք չեն ստացել Ադրբեջանի կողմից»,- նշել է Բալայանը։
Նա հիշեցրել է, որ մինչ այժմ Ադրբեջանի իշխանությունների համար որևէ հետևանք չեն ունեցել միջազգային մարդասիրական իրավունքի, միջազգային իրավական կարգի և Արդարադատության միջազգային դատարանի պարտավորեցնող որոշումների խախտումները։
«Հետևանքների բացակայությունն ստեղծել է լիակատար անպատժելիության մթնոլորտ՝ խրախուսելով Ադրբեջանին շարունակել իր ագրեսիվ ծրագրերը Հայաստանի տարածքային ամբողջականության դեմ կեղծ անիրեդենտիստական պատմվածքների միջոցով»,- ընդգծել է նա:
Բալայանը նաև նշել է, որ քննարկվող բանաձևի նախագիծը մեծ նշանակություն ունի, քանի որ եթե ընդունվի և համակցվի Դաշնային կառավարության ծրագրի դրույթների հետ՝ բավարար հիմք կստեղծի խորհրդարանական հետագա գործունեության համար։
«Առաջին անգամ Դաշնային կառավարության կոալիցիոն համաձայնագրում մի ամբողջ պարբերություն նվիրված է Հայաստանի ժողովրդավարական ճանապարհին աջակցելու անհրաժեշտությանը, հայերի՝ իրենց նախնիների հայրենիք՝ Լեռնային Ղարաբաղ վերադառնալու իրավունքին, ինչպես նաև Հարավային Կովկասում կայունության և խաղաղության կարևորությանը»,- ասել է դեսպանը։
Բալայանի խոսքով՝ սա վկայում է ՀՀ-ի «օրինակելի հարաբերությունները» Բելգիայի հետ և այն խորը կապը, որը միավորում է հայ և բելգիացի ժողովուրդներին։
Մարտի 18-ին Շվեյցարիայի խորհրդարանը հավանություն էր տվել արցախցիների՝ Լեռնային Ղարաբաղ վերադարձնելու հարցի շուրջ քննարկումներ սկսելու մասին բանաձևին:
