Ամենայն հայոց կաթողիկոս Գարեգին Բ-ն Էջմիածին այցելած Գերմանիայի նախագահ Ֆրանկ-Վալտեր Շտայնմայերին խնդրել է Բաքվում բարձրաձայնել Արցախի ժողովրդի իրավունքների, հայ ռազմագերիների ազատ արձակման հիմնախնդիրները, հայտնում է Մայր Աթոռը։
«Նկատի ունենալով այն, որ Գերմանիայի նախագահը մեկնելու է նաև Ադրբեջան՝ Վեհափառ Հայրապետը խնդրանքով դիմեց պրն․ Ֆրանկ-Վալտեր Շտայնմայերին՝ Բաքվում բարձրաձայնելու Արցախի ժողովրդի արդար իրավունքների, ինչպես նաև հայ ռազմագերիների ազատ արձակման, հայկական հոգևոր-մշակութային ժառանգության պահպանության հիմնախնդիրները»,- ասվում է հաղորդագրության մեջ։
Կաթողիկոսը շեշտել է, որ առկա հարցերի արդար հանգուցալուծմամբ միայն հնարավոր պիտի լինի տարածաշրջանում կայուն խաղաղություն հաստատել և ժողովուրդների խաղաղ գոյակցության պայմաններ ստեղծել։
Շտայնմայերը հավաստիացրել է, որ իր միջնորդական ջանքերը կգործադրի ի նպաստ տարածաշրջանում վերջնական խաղաղության հաստատման։
Գերմանիայի նախագահը մարտի 31-ից աշխատանքային այցով գտնվում էր Հայաստանում։ Ծիծեռնակաբերդի հուշահամալիրում նա հարգանքի տուրք էր մատուցել Հայոց ցեղասպանության զոհերի հիշատակին։ Ապրիլի 1-ին նա մեկնել է Ադրբեջան։ Շտայնմայերի պատվիրակության՝ Հայաստան այցի ընթացքում Հայաստանն ու Գերմանիան ստորագրել էին ֆինանսական համագործակցության համաձայնագիր։ ՀՀ վարչապետ Նիկոլ Փաշինյանի հետ հանդիպմանը Գերմանիայի նախագահն աջակցություն էր հայտնել Հայաստանի խաղաղության օրակարգին։
Մարտի 31-ին Շտայնմայերը սոցցանցերում հրապարակել էր Ադրբեջանի կողմից օկուպացված Արցախի Հանրապետության դրոշի լուսանկարը։ «Հակամարտությունը վերաբերում է Լեռնային Ղարաբաղի տարածքին: Միջազգային իրավունքի տեսակետից այս տարածաշրջանը պատկանում է Ադրբեջանին, սակայն այն հիմնականում բնակեցված է հայերով: Վերջին տասնամյակների ընթացքում այնտեղ բազմիցս զինված բախումներ են տեղի ունեցել»,- գրել էր նախագահը այս հրապարակման մեջ, որն ավելի ուշ հեռացվել էր։ Հրապարակման պատճառով Ադրբեջանում Գերմանիայի դեսպանը կանչվել էր Ադրբեջանի ԱԳՆ։
