Արցախի նախագահ Սամվել Շահրամանյանը՝ հրավիրված աշխատանքային խորհրդակցության ընթացքում ներկայացնելով նորանշանակ պետնախարար Արթուր Հարությունյանին, անդրադարձել է նաև Բերձորի միջանցքով՝ Գորիս-Ստեփանակերտ մայրուղով, և Ակնա-Ստեփանակերտ ճանապարհով Կարմիր խաչի միջազգային կոմիտեի մեքենաներով բեռների տեղափոխման գործընթացին, հայտնում է Արցախի կառավարությունը
«Այս որոշումը մեր սուբյեկտայնության պահպանման հարցում ոչ մի զիջում չի նախատեսում»,- ասել է Արցախի նախագահը՝ նշելով, որ խորացող հումանիտար ճգնաժամը վերածվում է աղետի, իսկ բնակչության կյանքն ու առողջությունն Արցախի իշխանությունների համար բարձր արժեք են։
Խոսելով նորանշանակ պետնախարարի մասին՝ երկրի ղեկավարն ընդգծել է, որ որոշումը կայացնելիս հաշվի է առել Արթուր Հարությունյանի բարձր պրոֆեսիոնալիզմը, գիտելիքներն ու պետական համակարգում նրա փորձը, ինչպես նաև այն հանգամանքը, որ նա հանդիսանում էր Արցախի խորհրդարանի ամենամեծ խմբակցության ղեկավարը, և պետության առջև ծառացած խնդիրների լուծման գործում պետք է ստանձնի պատասխանատվության իր չափաբաժինը:
Ամենօրյա աշխատանքում կառավարության անդամներից ակնկալելով խիստ կարգապահություն՝ նախագահ Շահրամանյանը հայտարարել է, որ պետական ինստիտուտների պահպանումը բոլորի գերխնդիրն է, և պետք է անզիջում պայքար տանել պետության հիմքերը խարխլողների դեմ:
Սեպտեմբերի 18-ի առավոտյան ԿԽՄԿ-ն անհրաժեշտ մարդասիրական օգնություն էր հասցրել Ստեփանակերտ՝ անցնելով միաժամանակ Լաչինի և Աղդամի ճանապարհներով։ Արցախի տեղեկատվական շտաբը հայտնել էր, որ Կարմիր խաչի միջազգային կոմիտեի կողմից Արցախ են տեղափոխվել բժշկական և հիգիենայի պարագաներ, ինչպես նաև նշել, որ ՌԴ Ռոստով քաղաքից նախատեսվում է բեռների տեղափոխում Լաչինի միջանցքի ու Աղդամի ճանապարհի ուղղություններով։
