Ադրբեջանը հրաժարվում է Երևան-Գյումրի ճանապարհատրանսպորտային պատահարից մահացած արցախցի Հելեն Դադայանի դին տեղափոխել հայրենիք, հայտնում է ՀՀ ԱԳՆ մամուլի խոսնակ Անի Բադալյանը։
«Հելենը Լեռնային Ղարաբաղի բնակիչ էր, սովորել է Հայաստանում։ Նա մահացել է 5 օր առաջ սարսափելի ավտովթարից։ Ադրբեջանը հրաժարվում է թույլ տալ, որ նրա մարմինը տեղափոխեն հայրենիք՝ հուղարկավորելու համար։ Այդ թվում՝ ԿԽՄԿ-ի միջոցով»,- X-ում նշել է Բադալյանը։
Օգոստոսի 14-ին ՀՀ ՆԳՆ-ն հայտնել էր, որ Երևան-Գյումրի ավտոճանապարհի 90-րդ կմ-ին բախվել են «Ֆոլքսվագեն» մարդատար միկրոավտոբուսը և «ԶԻԼ» բեռնատարը, ինչի հետևանքով 11 մարդ մահացել է, վեց վիրավոր հոսպիտալացվել էր։ Hamshen Tour տուրիստական ընկերությունից Armenia Today-ին հաստատել էին, որ Գյումրի-Երևան ավտոճանապարհին տեղի ունեցած վթարի մասնակիցներն իրենց զբոսաշրջային խմբից են։ Դեպքի առթիվ ՀՀ Քննչական կոմիտեն գործ էր հարուցել։
Օգոստոսի 18-ին ԿԽՄԿ երևանյան գրասենյակի մոտ բողոքի ցույց էր տեղի ունեցել՝ կապված Բաքվի կողմից Դադայանի աճյունն Արցախ տեղափոխելու արգելքի հետ։ Մի խումբ քաղաքացիներ ԿԽՄԿ-ից պահանջում էին հայտարարություն տարածել Արցախում տեղի ունեցող իրադարձությունների, ինչպես նաև Ադրբեջանի կողմից Հելենի աճյունն Արցախ տեղափոխելու թույլտվությունից հրաժարվելու վերաբերյալ։
