Այսօրվա աշխարհաքաղաքական պայմաններում չի բացառվում, որ ԵԱՀԿ Մինսկի խմբի եռանախագահության ձևաչափը փոխվի։ Armenia Today-ի հետ զրույցում նման տեսակետ հնչեցրեց Արցախի Աժ «ՀՅԴ» խմբակցության պատգամավոր, ԱԺ նախագահի տեղակալ
Վահրամ Բալայանն՝ անդրադառնալով ՌԴ ԱԳ նախարար Սերգեյ Լավրովի աղմկահարույց հայտարարությանը, թե ԱՄՆ-ն և Ֆրանսիան չեն ցանկանում Մինսկի խմբի եռանախագահության շրջանում Ռուսաստանի հետ շփումներ ունենալ։
«Ցավոք սրտի, մենք այսօր հայտնվել են գերտերությունների շահերի բախման կիզակետում և հնարավոր է՝ Մինսկի խմբի ձևաչափի փոփոխություն։ Բայց ցանկալի կլինի, որ այդ երեք երկրներն աշխատանքներ տանեն Արցախի հիմնախնդրի լուծման ուղղությամբ։ Տարիներ շարունակ այս խումբը որոշակի աշխատանքներ է տարել, սկզբունքներ են մշակվել Արցախյան հակամարտության կարգավորման շուրջ։ Ծանոթ են բոլոր նրբություններին և կարծում եմ՝ ճիշտ կլինի, որ հայկական դիվանագիտությունն աշխատի այդ ուղղությամբ և ջանքեր գործադրի, որ այդ երկրները միասին աշխատեն Արցախյան խնդրի կարգավարման ուղղությամբ»,- նկատեց պատգամավորը։
Հարցին, թե Մինսկի խմբի ձևաչափի հնարավոր սառեցման դեպքում, ո՞ր հարթակում պետք է լուծվի Արցախի հարցը, Բալայանն արձագանքեց․ «Այս պահին չենք կարող կանխատեսել, թե ինչ զարգացումներ կլինեն, ո՞ր երկրները կցանկանան դերակատարություն ունենալ Արցախյան հարցի լուծման հարցում, այստեղ հարց է նաև առաջացանում, թե նրանք ինչ շահեր կարող են ունենալ։ Հարցերը շատ են, հետևաբար, ինչպես ժողովուրդն է ասում, փորձված թանն անփորձ մածունից լավ է»։
Վահրամ Բալայանի խոսքով Արցախն այսօր բավականին բարդ և լարված իրավիճակում է գտնվում։ Ըստ նրա՝ այստեղ մեծ դեր ունի Ռուսաստանի Դաշնությունը։
ԱՀ պատգամավորի համոզմամբ՝ Արցախյան հարցի կարգավորման հարցում պետք է շարունակել աշխատել Ռուսաստանի հետ։
Բալայանի ներկայացմամբ՝ Արցախում հիմա սպասողական դրություն է․ քաղաքական ուժերն իրենց հերթին փորձեր են կատարում լուծում գտնելու հարցում։
Հիշեցնենք, որ Մոսկվայում տեղի ունեցած ՀՀ և ՌԴ արտգործնախարարների ասուլիսի ժամանակ Սերգեյ Լավրովը սենսացիոն հայտարարությամբ է հանդես եկել։ ՌԴ արտագործնախարարն ասել է, որ ԱՄՆ-ը և Ֆրանսիան չեն ցանկանում աշխատել Ռուսաստանի հետ Մինսկի խմբի ձևաչափում։ Լավրովը նշել է, թե չգիտի՝ ինչ կլինի հետագայում եռանախագահության հետ։ Սերգեյ Լավրովի այս միտքը Հայաստանում բուռն քննարկումների և մեկնաբանությունների առիթ է դարձել։
Ի դեպ, հարկ է ընդգծել, որ այս հայտարարությունից հետո ՀՀ է ժամանակի Մինսկի խմբի Ֆրանսիայի համանախագահը։
