Մաքուր Արցախ ունենալու անհրաժեշտությամբ պայմանավորված, և, հաշվի առնելով Արցախի մաքրությունը հասարակական նախաձեռնության միջոցով ապահովելու կարևորությունը, ««Որոշում» քաղաքացիական նախաձեռնություն» հասարակական կազմակերպությունը հոկտեմբերի 24-ին հայտարարել է «Մաքուր Արցախ» վերտառությամբ մրցույթ: Այն տեղի կունենա «Challenge» ձևաչափով, երբ մի մասնակից թիմը կատարում է մրցույթի կանոններով նախատեսված աշխատանքի իր բաժինը, դրա մասին համացանցում տեսաուղերձով է հանդես գալիս և կոչ անում մյուս թիմերին նույնպես մասնակցել մրցույթին:
Կազմակերպության նախագահ Արթուր Հայրապետյանը Armenia Today-ի թղթակցի հետ զրույցում նշել է, որ նախաձեռնության նպատակը բնապահպանական հարցերը ուշադրության կենտրոնում պահելն է, իսկ ընտրված ձևաչափը նպատակ ունի ավելի շատ մարդկանց ներգրավել շրջակա միջավայրի մաքրության խնդրին: Արթուր Հայրապետյանի խոսքով՝ մրցույթը պարբերական բնույթ է կրելու. Առաջին փուլը կտևի մինչև Նոր տարի: Արթուր Հայրապետյանը հավելել է նաև, որ նախաձեռնությանն արդեն արձագանքել են մի շարք երիտասարդներ, իսկ արտասահմանում ապրողները պատրասակամություն են հայտնել նյութական աջակցություն ցույց տալ:
Մրցույթին մասնակցելու կանոններն են՝
Ընտրել տարածքը, լուսանկարել այն` «մինչև» և «հետո» տարբերակով, թիմով կատարել մաքրում, նկարահանել մաքրման պրոցեսը (նախընտրելի է տեսանկարահանել)։ Մաքրած տարածքի և հավաքած աղբի նկարահանված նյութը տեղադրել համացանցում (կամ՝ ուղղակի սոցիալական ցանցերում, կամ՝ տեսապորտալներում, այդ դեպքում հղումը տեղադրելով սոցիալական ցանցերում), պարտադիր նշելով սահմանված հեշթեգը՝ #MaqurArtsakh և ««Որոշում» քաղաքացիական նախաձեռնության» էջը (չնշելու դեպքում տվյալ անձը մրցույթին չի մասնակցելու)։
I տեղը որոշվում է նկարահանված նյութի հավանումների քանակով (like) և պարգևատրվելու է Iphone 7 տեսակի բջջային հեռախոսով:
II տեղը որոշվում է պատահականության սկզբունքով և պարգևատրվելու է Samsung A 40 տեսակի բջջային հեռախոսով:
III տեղ զբաղեցրած թիմը որոշվելու է ««Որոշում» քաղաքացիական նախաձեռնության» ՀԿ-ի Խորհրդի կողմից ստեղծված հանձնաժողովը և պարգևատրվելու է Samsung J 10 տեսակի բջջային հեռախոսով:
Մրցույթին մասնակից մյուս թիմերին ևս, խրախուսելու համար, հովանավորների կողմից սահմանվելու են հատուկ անվանակարգեր։
Challenge-ին մասնակցողների ուղերձն է՝
Ողջույն։ Իմ թիմը միացել է ««Որոշում» քաղաքացիական նախաձեռնություն» հասարակական կազմակերպության կողմից հայտարարված «Մաքուր Արցախ» չելենջին և ներկայացնում է իր մաքրած տարածքը «մինչև» ու «հետո»:
