Ադրբեջանի արտաքին գործերի նախարարության խոսնակ Այխան Հաջիզադեն պահանջել է ԵՄ դիտորդական առաքելության դուրսբերումը Հայաստանի և Ադրբեջանի միջև սահմանից։ Նա այս հայտարարությունն արել է ադրբեջանական լրատվամիջոցներին տված հարցազրույցում։
Ըստ նախարարության խոսնակի՝ առաքելությունը «լայնորեն օգտագործվել է որպես քարոզչական գործիք Ադրբեջանի դեմ»։ Հաջիզադեն նշել է, որ Հայաստանը նախկինում ընդունել է Ադրբեջանի պայմանը՝ սահմանին երրորդ կողմեր չտեղակայելու վերաբերյալ։
«Հույս ունենք, որ խաղաղության համաձայնագրի ստորագրումից հետո Հայաստանը կկատարի այս համաձայնագրով ստանձնած պարտավորությունները»,- ասել է նա։
Մեկնաբանելով այն տեղեկությունները, որ Վաշինգտոնում գտնվող հայկական պատվիրակությունը քննարկել է Բաքվում պահվող հայ գերիների հարցը, Հաջիզադեն հայտարարել է, որ ադրբեջանական կողմը «շարունակում է իրավական գործընթացը» գերիների նկատմամբ, և «դատական գործընթացին ցանկացած միջամտություն անընդունելի է»։
Ադրբեջանի արտաքին գործերի նախարարության խոսնակը Հայաստանին մեղադրել է «ռազմականացման» մեջ։ Նրա խոսքով՝ սա Բաքվին «լուրջ մտահոգություն» է պատճառում և դիտվում է որպես «տարածաշրջանային կայունությանն սպառնացող վտանգ»։
Օգոստոսի 15-ին ԵՄ արտաքին և անվտանգային քաղաքականության հարցերով պաշտոնական ներկայացուցիչ Անիտա Հիպերը հայտնել էր, որ Հայաստանում ԵՄ դիտորդական առաքելությունը կշարունակի իր գործունեությունը։ Ըստ նրա՝ առաքելության մանդատի հնարավոր փոփոխությունները կքննարկվեն Երևանի և Բրյուսելի միջև:
