Հայաստանում Եվրամիության դիտորդական առաքելությունը (EUMA) կշարունակի իր գործունեությունը, ադրբեջանական ԶԼՄ-ներին հայտնել է ԵՄ արտաքին և անվտանգային քաղաքականության հարցերով պաշտոնական ներկայացուցիչ Անիտա Հիպերը։
Նա տեղեկացրել է, որ առաքելության մանդատի հնարավոր փոփոխությունները կքննարկվեն Երևանի և Բրյուսելի միջև:
«Առաքելության լիազորությունների մեջ է մտնում դիտարկել և զեկուցել հայ-ադրբեջանական սահմանին տիրող իրավիճակը՝ հայկական կողմից»,- նշել է ԵՄ պաշտոնյան։
Հիպերն այս համատեքստում հիշեցրել է, որ ԵՄ-ն ողջունել է Հայաստանի և Ադրբեջանի միջև խաղաղության պայմանագրի նախաստորագրումն ու կողմերին կոչ արել շուտափույթ ստորագրել և վավերացնել այն:
Օգոստոսի 8-ին Վաշինգտոնում Հայաստանի և Ադրբեջանի ղեկավարները ԱՄՆ-ի միջնորդությամբ հռչակագիր էին ստորագրել, որով նախատեսվում է ստեղծել TRIPP (Trump Route for International Peace and Prosperity) տրանսպորտային երթուղի: Երթուղին պետք է Ադրբեջանը միացնի Նախիջևանին Հայաստանի հարավով և գտնվի ամերիկյան կոնսորցիումի կառավարման ներքո։
Օգոստոսի 12-ին ՀՀ ԱԳՆ-ն հրապարակել էր Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագիրը, որն օգոստոսի 9-ին Վաշինգտոնում նախաստորագրվել էր երկու երկրների արտգործնախարարներ Արարատ Միրզոյանի և Ջեյհուն Բայրամովի կողմից։ Համաձայնագրով կողմերը պարտավորվել էին իրենց համատեղ սահմանի երկայնքով որևէ երրորդ կողմի ուժեր չտեղակայել։
Կարդացեք նաև՝
ԱՄՆ միջանցքի նախագիծը Հայաստանին տալիս է ժամանակ, բայց ոչ երաշխիքներ․ Սուրեն Պարսյան
