Ադրբեջանի հետ բոլոր հարցերի շուրջ ինտենսիվ շփումներ են տեղի ունենում, տեմպը վատը չէ, ճեպազրույցի ժամանակ հայտարարել է ՀՀ վարչապետ Նիկոլ Փաշինյանի աշխատակազմի ղեկավար Արայիկ Հարությունյանը։
«Երբ արդյունքներ լինում են, այդ մասին խոսում ենք։ Այն տեմպը, որ կա ՀՀ-Ադրբեջան գործընթացում, հարաբերություններում, վատը չէ։ Օրինակ՝ Ադրբեջանի կողմից իր մասով հայկական բեռների շրջափակման արգելքի հանումը»,- նշել է նա։
Անդրադառնալով «Զանգեզուրի միջանցքին», Հարությունյանը նշել է, որ այդ թեմայի վերաբերյալ Հայաստանը հայտնել է իր դիրքորոշումը, նույնը վերաբերում է ադրբեջանական կողմին։
«Կան ստորագրված փաստաթղթեր, որոնցում առկա են հստակ եզրույթներ, տեղանուններ, անվանումներ, ինչո՞ւ եք անընդհատ լարվածություն մտցնում։ Երկողղմ շփումներում խաղաղության պայմանագրի ստորագրման հարցն անընդհատ կա, պետք է փորձենք ընդհանուր եզրեր գտնել՝ օր առաջ այդ փաստաթուղթն ստորագրելու համար»,- ասել է նա։
Օգոստոսի 8-ին Վաշինգտոնում Հայաստանի և Ադրբեջանի ղեկավարները ԱՄՆ-ի միջնորդությամբ հռչակագիր էին ստորագրել, որով նախատեսվում է ստեղծել Սյունիքով անցնող ճանապարհ, որն ապաշրջափակվելու է «Միջազգային խաղաղության և բարգավաճման համար Թրամփի ուղի» (TRIPP) ծրագրով։ Երթուղին պետք է Ադրբեջանը միացնի Նախիջևանին Հայաստանի հարավով և գտնվի ամերիկյան կոնսորցիումի կառավարման ներքո։
Օգոստոսի 12-ին ՀՀ ԱԳՆ-ն հրապարակել էր Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագիրը, որն օգոստոսի 9-ին Վաշինգտոնում նախաստորագրվել էր երկու երկրների արտգործնախարարներ Արարատ Միրզոյանի և Ջեյհուն Բայրամովի կողմից։
