Սիրիայի պաշտոնանկ արված նախագահ Բաշար ալ-Ասադը, ով ապաստան է գտել Ռուսաստանում, իր ընտանիքի հետ ապրում է Մոսկվայում և ժամանակն անցկացնում է առցանց խաղեր խաղալով, հայտնում է գերմանական Die Zeit թերթը՝ հղում անելով նախկին առաջնորդի ընտանիքին մոտ կանգնած աղբյուրին:
Աղբյուրի համաձայն՝ Ասադն էլիտար շենքում երեք բնակարան ունի՝ առևտրի կենտրոնով, և երբեմն անձամբ այցելում է այնտեղ: Մնացած ժամանակ, ըստ աղբյուրի, նախընտրում է մնալ տանը և խաղալ տեսախաղեր: Նշվում է, որ նրա ընտանիքը Մոսկվայի մարզում ունի ամառանոց, որը հսկվում է մասնավոր անվտանգության ընկերության կողմից:
Die Zeit-ը պարզաբանում է, որ այս տեղեկատվության իսկությունը չի հաջողվել ստուգել: Թերթը նաև նշում է, որ Ասադների ընտանիքը մոտ երկու տասնյակ բնակարան ունի Մոսկվայի «Մայրաքաղաքների քաղաք» համալիրում: Այս մասին գրել էր Financial Times-ը դեռևս 2019 թվականին՝ գնահատելով, որ նախկին նախագահի հարազատները լիբանանյան օֆշորային ընկերությունների միջոցով Ռուսաստանում ձեռք են բերել շուրջ 40 մլն դոլարի անշարժ գույք:
2024 թվականի դեկտեմբերին զինված ընդդիմությունը մտել էր Դամասկոս, որից հետո Ասադը հրաժարական էր տվել և լքել երկիրը: Ահմեդ ալ-Շարաան՝ «Հայաթ Թահրիր ալ-Շամ» կազմակերպության առաջնորդը, դարձել էր ժամանակավոր նախագահ:
Reuters-ի տվյալներով՝ փախուստից առաջ Ասադը Սիրիայից դուրս է բերել մոտ 500 000 դոլար կանխիկ գումար, արժեթղթեր, փաստաթղթեր և գաղտնի տեղեկատվություն պարունակող կրիչներ: Նրա ընտանիքին և հարազատներին տարհանելու համար օգտագործվել էր մասնավոր Embraer ինքնաթիռ, որը մի քանի թռիչք էր կատարել Սիրիայի և Ռուսաստանի միջև ռեժիմի անկումից երկու օր առաջ: Կրեմլը նախկինում հայտարարել էր, որ տեղեկություններ չունի Ասադների ընտանիքի Մոսկվա քաղաքում գտնվող սեփականության մասին՝ ընդգծելով, որ «Ռուսաստանն ունի ազատ շուկա», և օտարերկրացիներն իրավունք ունեն անշարժ գույք գնել:
