Իրանի գերագույն հոգևոր առաջնորդի միջազգային հարցերով ավագ խորհրդական Ալի Աքբար Վելայաթին խստորեն դատապարտել է Ադրբեջանում իսրայելական ռաբինների գագաթնաժողով անցկացնելու մասին տեղեկությունները՝ այդ քայլը որակելով աննախադեպ և «հակաիսլամական», հայտնում է Mehr գործակալությունը:
Սոցցանցերում տարածված հաղորդագրության մեջ Վելայաթին զարմանք և ափսոսանք է հայտնել՝ նշելով, թե հույս ունի, որ լուրը ճիշտ չէ։
«Սա առաջին անգամն է, որ Ադրբեջանի կառավարությունը նման խախտում է թույլ տալիս, ինչը խաթարում է ինչպես իսլամը, այնպես էլ շիականության համաշխարհային հեղինակությունը»,- հայտարարել է նա։
Իրանցի բարձրաստիճան պաշտոնյան զգուշացրել է, որ համաժողովի նպատակն, ամենայն հավանականությամբ, կարող է լինել այսպես կոչված՝ «Աբրահամյան համաձայնագրերի» ընդլայնումը և Ադրբեջանի ներքաշումն այդ գործընթացի մեջ։
Վելայաթին նաև հարցականի տակ է դրել Բաքվի համագործակցությունն Իսրայելի հետ՝ մատնանշելով «իսրայելական ռեժիմի թշնամական գործողությունները մահմեդական երկրների դեմ»։
Ադրբեջանի Իսրայելի նորանշանակ դեսպան Ռոնեն Կրաուսն օգոստոսին հայտարարել էր, որ Թել Ավիվի ռազմական համագործակցությունը Բաքվի հետ բարձր մակարդակի վրա է և զարգանում է:
