Ադրբեջանի կողմից բռնազավթված Ստեփանակերտում հուլիսի 3-4-ն անցկացված Տնտեսական համագործակցության կազմակերպության (ՏՀԿ) 17-րդ գագաթնաժողովն Ադրբեջանի նախագահ Իլհամ Ալիևն օգտագործեց՝ Հայաստանի նկատմամբ կեղծ մեղադրանքներ և անհիմն պահանջներ հնչեցնելու համար, հայտնում է «Գեղարդ» գիտահետազոտական հիմնադրամը։
Ըստ հիմնադրամի՝ ՏՀԿ անդամ երկրների ղեկավարներին Ալիևը հրավիրել էր Ստեփանակերտ՝ նրանց ներկայությամբ լեգիտիմացնելու իր հերթական հակահայկական ելույթը։
«Արցախի ամբողջական հայաթափումից հետո Ադրբեջանի վարած քաղաքականության առանցքում այսօր կանգնած է պատմության վերաշարադրման փորձը՝ հիմնված խեղաթյուրված և մանիպուլյատիվ մոտեցումների վրա։ Ըստ այդմ՝ Ալիևի ելույթի գրեթե կեսը նվիրված էր Հայաստանի հասցեին ուղղված մեղադրանքներին։ Հարց է ծագում՝ միջազգային ո՞ր կազմակերպություններն ու ե՞րբ են արձանագրել այն «վանդալիզմը», որի մասին պարբերաբար խոսում է Բաքուն։ Իրականում՝ ամբողջապես հակառակ պատկերն է փաստագրվել միջազգային մի շարք կառույցների և դիտորդական առաքելությունների կողմից»,- գրում է հիմնադրամը։
Ընդգծվում է, որ Ստեփանակերտում գագաթնաժողովին մասնակցած պետությունները՝ Ադրբեջան, Թուրքիա, Պակիստան, Աֆղանստան, Տաջիկստան, Ղրղզստան, Ղազախստան, Ուզբեկստան, Թուրքմենստան, ինչպես նաև՝ Իրանը, պետք է հստակ գիտակցեն, որ Ստեփանակերտը եղել և մնում է պատմական հայկական քաղաք, որի հայաթափումը հետևանք էր Ադրբեջանի ագրեսիվ և էթնիկ զտման քաղաքականության։
Հիմնադրամը շեշտում է, որ «Արևմտյան Ադրբեջանի համայնք» կոչվող կազմակերպությունը հանդիսանում է Ադրբեջանի կողմից ստեղծված ճնշման և մանիպուլյացիայի գործիք՝ ուղղված Հայաստանի դեմ։, իսկ «վերադարձի» մասին հնչող պահանջները ոչ թե իրավական են, այլ սպառնալիք՝ ուղղված տարածաշրջանային անվտանգության ու կայունության խաթարմանը։
«Հետևաբար՝ այն պետությունները, որոնք մասնակցում են նման նախաձեռնություններին, քվեարկում են համապատասխան բանաձևերի օգտին կամ աջակցում են Ալիևի հռետորաբանությանը, դառնում են հանցակից Ադրբեջանին՝ տարածաշրջանում հնարավոր նոր ագրեսիայի պարագայում»,- եզրափակել են հիմնադրամից։
Մայիսին «Գեղարդ»-ը դատապարտել էր Հորդանանում Ադրբեջանի կազմակերպած միջոցառումը։ Հիմնադրամը շեշտել էր, որ Ադրբեջանի կողմից նման միջոցառումների և ցուցահանդեսների կազմակերպումն ակնհայտորեն նպատակաուղղված է շինծու «Արևմտյան Ադրբեջան» հասկացության միջազգայնացմանը։
