Թուրքիան և Ադրբեջանը ծրագրում են համատեղ արտադրել նորագույն Sivrisinek սպասողական ռեժիմով թռիչք կատարող զինամթերք, հայտնում են ադրբեջանական լրատվամիջոցները՝ հղում անելով թուրքական Baykar ընկերության գործադիր տնօրեն Հալուկ Բայրաքթարին։
Նրա խոսքով՝ Ստամբուլում SAHA 2026 պաշտպանական ցուցահանդեսում ներկայացված բոլոր անօդաչու թռչող սարքերը կարտադրվեն Ադրբեջանում գտնվող գործարաններում։ Թուրքական լրատվամիջոցների փոխանցմամբ՝ Baykar-ը Sivrisinek ԱԹՍ-ն ներկայացրել էր ապրիլին։ Նոր ԱԹՍ-ն ունի 900-1000 կմ թռիչքի շառավիղ։
Ընկերությունն այն անվանում է «նոր սերնդի ունիվերսալ պտտվող զինամթերքի համակարգ» և նշում, որ համակարգն ունի արհեստական բանականության վրա հիմնված առաջադեմ ինքնավար տեղանքի կողմնորոշում և թիրախի ճանաչում։
2024 թվականի փետրվարին հաղորդվել էր, որ Ադրբեջանի զինված ուժերը սպառազինության մեջ ընդունել են թուրքական նորագույն Akinci հարձակողական անօդաչու թռչող սարքեր։
