Հայ ազգային կոնգրեսի փոխնախագահ Լևոն Զուրաբյանը հրավիրած ճեպազրույցում խոսել է կուսակցության առաջարկությունների մասին։ Նա նշել է, որ ընտրական պայքարի մեջ մտնում են որպես խաղաղության, ռացիոնալիզմի, ռազմավարական հաշվարկի, լիարժեք անկախության, պաշտպանության, տեխնոլոգիական հեղափոխության կուսակցություն։
Վերադարձ «կիսանախագահական» կառավարման համակարգին
Նախագահական խորհրդարանական կամ կիսանախագահական համակարգին անցումը կապահովի զսպումների և հակակշռների համակարգ Հայաստանում, նշել է Զուրաբյանը։ Նրա խոսքով՝ այդ զսպումների և հակակշիռների համակարգը պետք է զարգացնեն, որպեսզի կարողանանք նաև ամբողջ արդարադատական համակարգը, քննչական ապարատը, դատարանները, դատախազությունն ազատել գործադիր իշխանության վերահսկողությունից։ Նա առաջարկել է ստեղծել անկախ գործող համակարգ, որպեսզի իշխանություններն էլ միշտ վախենան, որ իրենք գտնվում են վերահսկողության ներքո և պարտավոր են հետևել օրենքին և Սահմանադրության պահանջներին։
Արդար բիզնես միջավայրի կառուցում, անվճար բուհեր, թոշակների բարձրացում
Բիզնես միջավայրի առողջացման ուղղությամբ հաջորդ քայլը լինելու է արդար բիզնես միջավայրի կառուցումը, ինչպես նաև շնորհապետական (մերիտոկրատական) պետական համակարգի ստեղծումը, հայտարարել է Զուրաբյանը։ Դա հասարակական այն կարգն է, որտեղ մարդիկ նշանակվում են պաշտոնների ըստ իրենց արժանիքների։ Նա հիշեցրել է, որ 2008-2012 թվականին, դա կուսակցության առաջնորդ Լևոն Տեր-Պետրոսյանի հեղինակային բառն էր, մերիտոկրատիան նա հայերեն թարգմանել էր որպես շնորհապետություն։
«Այդ պահից սկսած՝ մեր ծրագրերի մեջ միշտ շնորհապետական համակարգ կա ու մնալու է։ Ի՞նչ ենք առաջարկում, ըստ էության, երեք մեծ կատեգորիայի մարդկանց համար, դրանք աշխատողներն են, ուսանողները և թոշակառուները։ Աշխատող մարդկանց համար բիզնես միջավայր, բարելավում և այլն։ Ուսանողների համար մտցնելու ենք անվճար բարձրագույն կրթություն։ Հանդես ենք գալու պետական ուսանողական բանկի ստեղծման գաղափարով, որը թույլ է տալու երկարաժամկետ վարկեր տալ բոլոր ուսանողներին, որպեսզի կարողանան չունենալով այդ գումարները՝ ստանալ կրթություն, իսկ հետո աշխատանքի ընդունվելով, ասենք՝ վերադարձնել։
Ի՞նչ ենք ուզում առաջարկել թոշակառուներին։ Առաջին օրը, երբ գանք իշխանության, նախաձեռնելու ենք պատշաճ օրենսդրական գործընթաց, որով թոշակառուների թոշակները ևս 10 000 դրամով կբարձրանան»,- թվարկել է Զուրաբյանը։
Նա պարզաբանել է, որ բարձրացումն իրականացնելու են պատշաճ բյուջետավորման պրոցեսով, հաշվարկել են, որ դա հնարավոր է, որովհետև թոշակները հիմա ավելի դանդաղ են աճում, քան միջին աշխատավարձը, և այդ պրոցեսը կարելի է շրջել, թոշակների աճը համընթաց դարձնել միջին աշխատավարձին։
Ոչ թե «Զանգեզուրի միջանցք», այլ «Զանգեզուրի հանգույց»
ՀԱԿ փոխնախագահը հայտարարել է, որ TRIPP նախագիծը միայն արևմուտքի՝ Թուրքիայի, Ադրբեջանի համար է, այնինչ՝ պետք է կառուցել «Զանգեզուրի հանգույց», որը կունենա նաև հարավ-հյուսիսյան կոմունիկացիա, որը պետք է Հայաստանն Իրանով կապի Պարսից ծոցին։
«Հիմա տեսնում ենք՝ ինչքան կարևոր է այդ կապը, և նման խաղաղության կառուցումը կստեղծի աշխարհաքաղաքական բալանս և ավելի քիչ խոցելի կդարձնի խաղաղությունը կոնկրետ Հայաստանի շուրջ և կապահովի Հայաստանի անկախ կոմունիկացիաները դեպի Ծոց՝ շրջանցելով Ադրբեջանը և Թուրքիան։ Սա մեր մոդելն է, մենք սա կոչում ենք ինքնիշխան խաղաղության մոդել, դա միակն է, որ աշխատելու է»,- նշել է նա։
2025 թվականի ավարտին կուսակցությունը հայտարարել էր, որ գործադիր վարչության փոխնախագահ Զուրաբյանին վարչապետի թեկնածու կառաջադրեն։ ՀԱԿ փոխնախագահ Արամ Մանուկյանը նշել էր, որ մասնակցության և թեկնածուի որոշումները կայացրել են միաձայն՝ կուսակցության վարչության նիստում։
Զուրաբյանը ներկայացրել էր կուսակցության նախընտրական ծրագիրը, որով նախատեսում են չեղարկել գործող իշխանությունների մի շարք ծրագրեր, որոնց թվում է «Ակադեմիական քաղաքը», խորհրդարանական համակարգը, կարևորել էր անվտանգ ու խաղաղ երկիր ունենալու անհրաժեշտությունը։
