ՌԴ ԱԳՆ պաշտոնական ներկայացուցիչ Մարիա Զախարովան մտահոգություն է հայտնել ՌԴ քաղաքացի, Wargonzo-ի լրագրող Դիմիտրի Սելեզնյովի՝ Հայաստան մուտքի արգելքի վերաբերյալ։
Նրա խոսքով՝ Հայաստանի ներկա ղեկավարներն «իշխանության են եկել խոսքի ազատության պաշտպանության ներքո և ահա թե ինչի են հասել այսօր»։
Զախարովան ընդգծել է, որ հատկապես անհանգստացնող է արգելքի անժամկետ բնույթը և դրա վերացման որևէ մեխանիզմի բացակայությունը։
Նա հիշեցրել է, որ Սելեզնյովը 2020թ․ հայ-ադրբեջանական պատերազմի մասին է հայտնել և նշել, որ Մոսկվան Երևանին արդեն ուղարկել է պաշտոնական հարցում՝ պարզաբանելու որոշումը։
«Հուսով ենք՝ որոշումը կապված չէ նրա մասնագիտական գործունեության հետ, հակառակ դեպքում՝ դա որևէ կերպ չի համատեղվում մամուլի ազատության կողմնակցի կերպարի հետ, որը ներկայացնում է {ՀՀ վարչապետ Նիկոլ} Փաշինյանը»,- հայտարարել է ԱԳՆ խոսնակը։
Նոյեմբերի 14-ին Սելեզնյովին չէին թույլատրել մուտք գործել Հայաստան, երբ նա ընտանիքի հետ գալիս էր հանգստի։ Նրա խոսքով՝ սահմանին իրեն մի քանի ժամ պահելուց հետո հայտնել են մուտքի մերժման մասին։
Սելեզնյովը մի քանի անգամ այցելել է Արցախ, 2020 թվականի պատերազմի ժամանակ աշխատել է որպես ռազմական թղթակից, պարբերաբար այցելել է նաև Հայաստան՝ քաղաքական զարգացումները լուսաբանելու նպատակով։
